2021eko azaroaren 30ean zendu zen, minbiziak jota, Panpi Ladutxe. «Artista», kantxa barruan eta kanpoan. Hitz horixe errepikatu zuten gehien berarekin pilotalekuan uneren bat konpartitzeko zoria izan zutenek.

Pilotari, prestatzaile, kantari eta askoz gehiago ere bazen azkaindar polifazetikoa. «Ohiko bizimoduan zabaltzen zuen alaitasun hori kantxara eraman egiten zuen eta pilotari artista eta geniala izan zen, ikusteko oso polita», azaldu zuen Joxean Tolosak, ezkerparetan 20 urte luzez lagun izan zuen atzelari handiak. Aspaldi samarretik larri zegoela bazekien arren, kolpe handia hartu zuela ezkutatu ezinik zen amezketarra.

Bien izenak elkarrekin pasatu ziren historiara, Binakako bi txapela lortu baitzituzten 1987an eta 1989an, mugarri bat ezarriz, azkaindarra izan baitzen ezkerparetan txapelketa nagusi bateko txapela jantzi zuen Ipar Euskal Herriko lehen pilotaria.

Horixe izan zen, Bidasoaz iparraldera eta hegoaldera zubigile aritzearena, erabat zukutu nahi izan zuen bere bizitzaren beste ardatzetako bat.

Kantuan aritzea zuen bere bigarren pasio handia. Urtean 100dik gora kantaldi emandakoa da, eta hiru disko grabatutakoa, ‘Aitari’ 1995ean argitaratutakoa, ‘Chansons du Pays Basque’ 2002koa eta azkena, ‘Orhoit’, 2012koa. Telebistan eta irratietan esatari, jatetxean, dendan... denetan artista, biziari zuku ederra ateraz.