Jazarpen sexistaren aurrean udaletan protokoloak sortzen laguntzeko gida plazaratu du Gipuzkoako Aldundiak

Gidaliburua Diputazioko Berdintasunerako Organoaren ekimena da, erakundeetan jazarpen sexistaren aurreko prebentzioan eragin nahi du eta toki administrazio osoari zuzenduta dago, «protokoloak garatu ditzaten». «Helburua» da «prebentzio jarduerak» eta «prozedura argi eta zehatzak aurreikusten» laguntzea, azaldu dutenez.

Gipuzkoako Foru Aldundiko Emakumeen eta Gizonen Berdintasunerako Organoak publikatu duen eskuliburua «orientagarria» da eta udalei zuzenduta dago, jazarpen sexistaren aurrean jarduteko protokoloen garapenean laguntzeko.

Ohar batean nabarmendu dutenez, lan eremuan jazarpen sexista da indarkeria sexistaren adierazpen nagusia, eta ohikoa da «sexu-jazarpena eta sexuan oinarritutako jazarpena ezberdintzea». Lan arloko indarkeria matxistaren adierazpen bi horiek «langileen duintasunaren aurkako erasoa era sexuagatiko diskriminazioa» direla gogoratu du eta administrazio publikoek arlo horretan eragiteko duten erantzukizuna aipatu du.

Arazoaren dimentsioa nabarmentzeko, Aldundiak gogora ekarri du FRAk (oinarrizko eskubideen Europar Batasuneko agentzia) 2014an argitaratutako inkesta batean ondorioztatutakoa: 15 urtetik aurrera gutxienez behin sexu jazarpena jasan duten 28 estatu kideetako emakumeen artean, %33k lankide bat, nagusi bat edo bezero bat aipatzen zuten egiletzat, eta zuzendaritza postuetako emakumeen artean %75 inguruk bizitzan zehar sexu jazarpena jasan zutela adierazten zuen.

Miren Elgarresta Berdintasunerako foru zuzendariak erakundeek «eredu» izan behar dutela adierazi du eta indarkeria matxistaren aurkako politiketan «traktore gisa» jarduteko erantzukizuna aipatu du.

Jardunbide egokiak, eredu

Gipuzkoako Foru Aldundiaren helburua «bigarren belaunaldiko protokoloak aktibatzea» dela adierazi du Elgarrestak, eta zehaztu du «protokolo espezifiko bat» lantzen ari dela, «lehendik dauden prebentzio sistemetan beste pauso bat emateko eta lan eremutan jazarpen sexista prebenitzera soilik bideratutako protokolo bat sortzeko».

Bestalde, «gidan jasotako jarraibideak udalen errealitatera eta beharretara egokitu daitezen», lau udalerritako esperientziak «eta jardunbide egokiak» kontuan hartu direla, azaldu dute Aldunditik: Donostiakoa, Iruñekoa, Pasaiakoa eta Zizur Nagusikoa. Era berean, herrialdeko udaletako teknikariekin lan prozesuak sortu direla zehaztu dute.