Alejandro Gonzalez Iñarritu zuzendari mexikarrak 60 urte bete ditu

Duela 60 urte jaio zen Alejandro Gonzalez Iñarritu. Zinemagile mexikarra lau Oscar Sari irabazitakoa da eta aski ezaguna nazioartean.

Alejandro Gonzalez Iñarritu mexikar zinemagile, gidoilari, ekoizle, esatari eta konpositorearen urtebetetze eguna da gaur: 60 urte bete ditu. Lau Oscar Sari irabazitakoa da eta nazioartean gehien goraipatzen duten zinemagileetako bat da.

Bere lehen filma, ‘Amores perros’, Cannesko Zinemaldian estreinatu zuen eta Kritikaren Asteko Sari Nagusia irabazi zuen. 2000. urtean, ingelesez besteko film onenaren Oscar Sari baterako izendatu zuten. Bere hurrengo filma, ‘21 gramo’, lehiaketa ofizialean aurkeztu zuen Veneziako Nazioarteko 60. zinemaldian.

2006an, Cannesko Nazioarteko Zinemaldiaren 59. edizioko lehia ofizialean aurkeztu zuen ‘Babel’ filma, eta Iñarrituk zuzendari onenaren saria irabazi zuen. Urte horretan bertan, pelikulak film dramatiko onenaren Urrezko Globoa irabazi zuen, Ameriketako Estatu Batuetako Zuzendarien Sindikatuaren (DGA) Sarietarako izendatua izan zen zuzendaritza onenagatik, eta zazpi Oscar Saritarako izendatua izan zen, tartean Iñarrituri zegozkion bi, film onenagatik eta zuzendari onenagatik.

2014an, hiru Oscar Sari irabazi zituen ‘Birdman’ pelikularekin: film onenarena, zuzendari onenarena eta jatorrizko gidoi onenarena. Hurrengo urtean, zuzendari onenaren Akademiaren bigarren Sari bat irabazi zuen ‘El renacido’ filmarengatik. Horrela, bi Oscar Sari jarraian irabazi dituen hirugarren zuzendaria bilakatu zen, eta lehena 1950etik. Filmak AEBetako Zuzendarien Sindikatuaren (DGA) Sari bat ere irabazi zuen.

Gainera, lorpen berezien Oscar sari bat jaso zuen ‘Carne y arena’ errealitate birtualeko instalazioagatik 2017an. Lana Cannesko Zinemaldian aurkeztutako errealitate birtualeko lehen instalazioa ere izan zen urte berean.

Gonzalez Iñarritu Cannesko 72. Zinema Jaialdiko epaimahaiko presidente bihurtu den lehen zinemagile latinoamerikarra bilakatu zen 2019an, Mexikoko Unibertsitate Nazional Autonomoko honoris causa doktoretza jaso zuen urte berean.