Arku-tiroa, tiro olinpikoa edota mendia, Arabako ‘Eskola Kirola’ programaren modalitateen artean

Arabako ‘Eskola Kirola’ programak jarduera berriak ekarriko ditu martxoan kirol modalitate ezberdinetan aritzeko. Arku-tiroa, tiro olinpikoa, mendia, badminton, squash edota txirrindularitza daude programazio berriko modalitateen artean.

Arabako Foru Aldundiko Kultura eta Kirol Sailak zortzi jarduera eskaintzen ditu martxorako, ‘Eskola Kirola’ jarduera irekien programaren barruan. Programa horrek «eskola-kirolaren programa osatzen duten kirol-modalitate batzuetako jarduera puntualen eskaintza zabala» eskaintzen du.

Aldundiak jakinarazi duenez, jarduerak irekita daude Arabako eskola-adinean dauden adingabeek parte har dezaten, dagokion kirol-modalitateko eskola-programan izena emanda dagoen edo ez kontuan hartu gabe.

Hain zuzen ere, martxoan zortzi jarduera egin ahal izango dira, besteak beste, tiro olinpikoa, arku, mendi, badminton, squash, txirrindularitza eta mahai-tenisa modalitateetan.

Jarduera irekien programa, 2023-2024 eskola-kirolaren programan bezala, 2017 eta 2008 bitarteko ikasleentzat da, baina jarduera bakoitzak zehazten du izena emateko adina.

Jarduerak Arabako kirol federazioek antolatzen dituzte, Arabako Foru Aldundiarekin dituzten eskola kiroleko hitzarmenen bidez. Kirol-federazioek zuzenean antola ditzakete jarduerak, beren bitartekoen bidez, edo osatzen duten klubetako baten esku utz ditzakete.

Izen-ematea

Aldundiak azaldu duenez, eskola-jarduera bakoitzean parte hartu ahal izango dute dagokion modalitateko eskola-kiroleko programan izena emanda daudenek zein izena emanda ez daudenek, hastapen-ikastaroetan izan ezik, horietan modalitatean izena eman ez duten ikasleek bakarrik parte hartu ahal izango baitute.

Inskribatzeko, jarduera bakoitzaren informazio-fitxan dagoen izena emateko inprimakia bete behar da. Formularioa automatikoki zuzenduko zaio jarduera antolatzen duen kirol-federazioari. Gainera, federazio antolatzaileek izena emateko beste bide propio batzuk ezarri ahal izango dituzte.

Jarduerak 2023-2024 eskola-kirolaren programaren aldi osoan egingo dira, ekainaren 21era arte. Programazioa, oro har, doakoa da edo kostu sinbolikoa du asistentzia-berme gisa.

Informazio guztia eskuragarri dago Arabako Foru Aldundiaren webgunean.