Gaurko egunez hil zen Mary Lou Williams musikagile aparta

Mary Lou Williams (Atlanta, 1910-Durham, 1981) estatubatuar jazz piano-jotzaile eta musikagilea izan zen. Ehunka abesti eta ehun album baino gehiago grabatu zituen. Maiatzaren 28an hil zen, duela 43 urte.

Mary Lou Williams Atlantan jaio zen, Georgian. 11 senideen artean bigarrena, Pennsylvaniako Pittsburgh hiriko East Liberty auzoan hazi zen. Oso gazte hasi zen musika lantzen: hiru urterekin dagoeneko bere kabuz ikasi zuen pianoa jotzen. Eta zazpi urterekin jendaurrean jotzen hasi zen. ‘The Little Piano Girl’ gisa ezagutzen zuten Pittsburgh-en. Nerabezarorako musikari profesionala zen.

Jazz piano-jotzaile eta musikagilea zen Williams. Ehunka abesti eta ehun album baino gehiago grabatu zituen. Lehendabiziko diskoa ‘The Zodiac Suite’ izan zen, 1945ean kaleratua, eragin klasikoa zuena. Kantu bakoitza zodiakoaren zeinu bati zegokion. Jack Parker eta Al Lucasekin grabatu zuen eta abenduaren 31n interpretatu zuen New Yorkeko The Town Hall-en, Ben Webster orkestra eta saxo tenor batekin.

Duke Ellington eta Benny Goodmanentzat idatzi zuen, eta lagun eta ikasle izan zituen Thelonious Monk, Charlie Parker, Miles Davis, Tadd Dameron, Bud Powell eta Dizzy Gillespie.

Lovie Austin aipatzen zuen bere eragin nabarmenen artean.

1954an katoliko bihurtu zen. Musikan etenaldi bat egin, eta gero bere musikaren izaera eraldatu zuen. Filantropo, hezitzaile eta gazteen tutore gisa aritu zen, eta lanean jarraitu zuen 1981ean maskuriko minbiziaren ondorioz hil zen arte. Bere azken grabazioak, ‘Solo Recital’ (Montreux Jazz Festival, 1978), hil baino hiru urte lehenago eginak, espiritualtasuna, ragtimea, bluesa eta swinga biltzen zituen.