Kontseiluaren zuzendaritza taldeak agerraldia egin du gaur goizean Donostian Estatu espainolak eta frantsesak, lehenak Carlos Urquijoren bidez eta bigarrenak Patrick Dallennesen bidez, egindako azken esku hartzeen inguruko irakurketa egiteko. Horrekin batera, egoera honen aurrean hartuko dituzten neurriak aurkeztu dituzte.

Data bat eman du Paul Bilbao Kontseiluko idazkari nagusiak: otsailaren 28a, data bat ez soilik auzitara eraman dituzten UEMAko hamabost udalei, Gipuzkoako Foru Aldundiari eta Uztaritzeko Udalari babesa agertzeko, hemen euskaraz bizi nahi duen herri bat dagoela erakusteko ere bai.

Euskarari «balio juridiko osoa» kentzeko helburua duten erasoen aurrean, udalek apustuari «determinazioz eutsiko» diotela ziurtatu du. «Guk gurea egingo dugu», erran du, baina erantzukizuna partekatua dela eta alderdi, instituzio eta eragileek erantzun bateratua emateko ordua dela nabarmendu du.