Denetariko bisitariak ditu Durangoko Azokak. Felipe, adibidez, lehendabiziko aldiz etorri da Iruñetik. Ahotsenean harrapatu dugu, familiarekin batera Guda Dantzaren emanaldiaz gozatzen. «Aspalditik etorri nahi nuen eta azkenean lortu dut», dio. Hainbertze eskaintzarekin oraindik «galdu samar» dagoela aitortu du. Iritsi berri dira.

Landako barrenean, poltsak erosketaz kargatuta topatu ditugu, berriz,  Arantza, Garbiñe, Itsaso, Josebiñe eta Ane. Hendaia eta Zugarramurdiko lagun kuadrilla gaztea da. Garbiñek aurreneko aldia du euskal kulturaren plazarik handiena den honetan. Lagunek konbentzitu dute eta gustatu zaio. Hori bai, famatu gehiago ikustea espero zuen. Vendettakoak ikusi ditu. Baina Hesian-ekoak eta Gatibukoak ere hemen barna dabiltzala erran diote eta adi ibiliko da.

Plateruenaren kanpoaldean solasean ari dira Angelita eta Garbiñe ondarroar "salerosak". Urteroko hitzordua da eurentzat Durango, hagitz gustuko dutelako giroa eta sentimendu bat sortzen dielako barrenean. Gaur, gainera, bertze egiteko bat ere badute bertan, ordu batean deituta dagoen eri dauden presoen eskubideen aldeko elkarretaratzea. Azokaren hastapenak ezagutu zituzten eta kontent daude indarra hartu duelako.

Euskal Herrian bi mundu gaude oraindik. Euskararen munduari bizkarra emanda bizi dira batzuk. Baina baikor azaldu dira ondarroarrak: «Haiek nahi baino lehen, guk nahi baino nekazago, lortuko dugu euskararen mundura erakartzea».