Elena Unzueta Bizkaiko Aldundiko bozeramaileak azaldu duenez, turismo bulego bat jarriko dute Gaztelugatxetik hurbil tokian duen erakartzeko balioa eta ingurumenaren babesa sustatzeko. Turismo bulego berria Bakio-Bermeo errepide zaharraren gaineko begiratoki batean kokatuko da, foru erakundearen jabetzako lekua delako. Bulegoa instalatzeko obra batzuk egin dira begiratokian eta txabola bat eraiki da.

Instalazioa Urremendi landa garapenerako elkarteak kudeatuko du eta Aste Santuan jarriko da abian, Bizkaiko Aldundiaren Gobernu Kontseiluak onetsi duen hitzarmenaren arabera.

Eraikinaren diseinuan eta fabrikazioan paisaiarekiko integrazio estetikoa lortu nahi izan da eta, horretarako, eraikinaren ageriko azalera osoa estaltzen duten zur tratatuak erabili dira. Aldi berean, bulegoaren tokiaren gaineko eraginak arintzeko, jarduerak garatzeko behar den elektrizitate guztia hornitzeko eguzki panelak jarri dira.

Turistei arreta emateko gunea irekita egongo da Aste Santuko eta Gabonetako hamabostaldietan eta udako hiletan (ekainaren 1etik irailaren 30era arte). Ordutegia etenik gabekoa izango da: Gabonetan 10.00etatik 17.00etara, eta Aste Santuan eta udan 10.00etatik 19.00etara.

Jendeari arreta eskaintzeko egongo den langileek euskaraz, gaztelaniaz, ingelesez eta frantsesez egingo dute lan eta tokiari buruzko eta Bizkai osoari buruzko informazioa emango dute.