Lakuako Gobernuak gaur onartu du ‘2017-2020 Euskararen Agenda Estrategikoa’, Kultura eta Hizkuntza Politikako sailburu Bingen Zupiriak azaldu duenez. Helburua euskararen ezagutza hedatzea da eta, adierazi dutenez, gazteengan jarriko dute indar berezia, 2020an 25 urtetik azpikoen %75a euskalduna izatea dute jomuga-eta.

Bide beretik, 2020an 788.100 herritar euskaraz komunikatzeko gai izatea bilatuko du proiektuak. Eta gai izateaz gain, erabilera eta kalitatea hobetu nahi ditu. Zentzu horretan etxeko erabilera %21etik igotzea eta lagun giroan %23an kokatzea du helburu.

Hezkuntzan Lehen Hezkuntzako 4. mailan %61,4ak eta DBH 2. mailan %44.7ak erabiltzea bilatuko dute. Lan munduan, bestetik, gizartearen %28ak lankideekin euskara erabiltzea markatu dute helburutzat. Administrazioko zerbitzuetan, aldiz, gizartearen %100ari euskarako zerbitzua eskaini nahi diote agenda honen amaieran.

Sare sozialetara begira ere jarri dira eta bertan euskararen erabilera %19,5era iristea dute jomuga.

Lan-talde berezi batek egingo du agendaren jarraipena. Gutxienez, urtero elkartuko da aurreko urteko helburuak nola bete diren aztertu asmoz eta martxan jarri beharreko erronkei nola aurre egin erabakitzeko. Konpromiso bakoitzaren betearazpena aztertuko da.