Nor ezkutatzen da Twitterreko @TheJasier erabiltzailearen atzean?Hasier Etxapare Kareaga. Tafallan jaio eta hazi nintzen, baina Iruñean bizi izan dut nerabezaroa eta Iruñean garatu naiz pertsona bezala. Gaur egun Gasteizen bizi naiz, baina askotan itzultzen naiz Nafarroara bisita egitera. Nire denboraren gehiengoa irakurtzen, idazten, filologia ikasten eta metal musika entzuten ematen dut. Nire Twitter kontuaz gain @kimerarock_ taldearen kontuaz arduratzen naiz, horregatik agertzen da Community manager nire Twitter profilean.

«En euskera no decimos "querido", decimos "laztana", que más o menos se traduce como "caricia", and I think that's beautiful». Horixe idatzi zenuen pasa den abenduaren 22an eta hari horri tiraka makina bat adibide gehitu zenituen. Zergatik abiatu zenuen hari hori?Egia esan, ez dago arrazoirik. Nire bikotekideari “laztana” esan ohi diot, eta bat batean ikusi nuen hitz horren erabilerak kutsu poetiko izugarria duela. Hasierako intentzioa ez zen horren hari luzea egitea, bakarrik txio hura bota nuen, baina egun hartan denbora librea soberan neukan eta etimologiaren bitxikeriei buruz pentsatzeko astia eduki nuen.

Haria egun osoan zehar eraiki nuen, pixkanaka, ideiak banan banan hartuz eta harira gehituz. Lehenengo bost edo sei txioak hizkuntzarekin jolasteagatik besterik ez nituen bidali, baina berehala ikusi nuen hariak ohi baino atsegite gehiago jasotzen zituela eta ikusi nuen euskararen edertasuna munduari erakusteko aukera on bat izango litzatekeela.

Lehen txioak ia 15.000 atsegite eta 8.000 aldiz izan da elkarbanatua. Harriduraz hartu duzu zure txioek izandako arrakasta?
Bai, guztiz harriturik jaso dut arrakasta hau. Banekien betikoek emango zidatela atsegitea, baina ez nuen uste horren azkar zabalduko zenik. Ikusi izan dut nola beste kontu batzuek nire txioen formatua erabili duten, haien hizkuntza propioekin berdina egiteko edo besterik gabe txisteak egiteko. Baina beno, horrela dira sare sozialak. Ezin jakin noiz edo nola jasoko duzun atentzioa.

Euskararen hamaika adibide eder ipini dituzu zure harian, bai eta Gabonei lotutakoak ere. Zeresana eman dute batzuek, bereziki euskara ezagutzen ez dutenen artean. Zein erantzunek harritu zaituzte gehien?
Harrigarriena dudarik gabe jasotako erantzunen aniztasun geografikoa da. Euskal Herritik idazteaz gain, ikusi dut nola Espainiatik eta Europako eta Ameriketako zenbait herrialdetik idatzi didaten. Erantzunen edukiari dagokionez, okerrena besteen ideiak ikustea zen, pentsatuz “Nola demontre ez zitzaidan hau niri bururatu?”.

Zure adibideen atzetik beste hamarnaka etorri dira Twitterreko beste erabiltzaileen eskutik. Zer deritzozu horri buruz?
Emaitza bikaina dela deritzot. Gaur egun Twitter erabiltzen duen edonork esan dezake Twitter gorrotoaren, banaketaren eta bortizkeriaren sare soziala dela, gai guztiak politizatzeko joera nazkagarri batek kutsatua. Beraz, ikusi dut nire Twitter kontuak xede on bat izan dezakeela: kultura zabaltzea, filologiaren edertasuna erakustea, eta batez ere hizkuntzen erabilpen politikoaren kontra jotzea.

Egun hauetan zehar ikusi dut nola nire harian eztabaida ugari sortu diren, euskara aitzaki bezala erabiliz noren edo haren interesak defendatzeko eta gaztelera goi mailako hizkuntza dela esateko eta zer dakit nik. Ez nazazue gaizki ulertu, nire ustez borroka politikoak oso garrantzitsuak dira, baina hizkuntzaren kontra jotzea oso mugimendu koldarra eta gaiztoa dela uste dut. Hizkuntza bat giza talde baten ikurra baino gehiago da, hizkuntza bat giza talde baten nortasunaren islada da, eta kulturaren oinarri den heinean, kulturak eskaini dezakeen altxorrik handiena da. Beraz, jendea kulturaren partekatzeaz gozatzen ikusteak asko pozten nau.

«Tiene cojones dedicarse a la poesía y la lingüística para hacerte famoso por un hilo de Twitter». Hori ere irakurri dugu zure Twitter kontuan. Olerkaria eta Filologian aditua zarela diozu Twitterren, baina Twitterreko hari batengatik famatu bihurtu zara egunotan. Zer diozu?
Ironia munduko indarrik boteretsuena dela, horixe diot. Ez nago haserre, hala ere. Lehen esan dudan moduan, egoera ospatzeko modukoa da eta ahal dudan bezainbeste probestuko dut lortu dudan eragin mediatikoa.

Bestalde, nire idazle-karreran izan dezakeen eraginaren beldur nago nolabait. Gustatuko litzaidake nire idazkiak egunen batean argitaratzea, eta ez litzaidake batere gustatuko argitaletxekoek @TheJasier bezala sinatzera bultzatzea. Ez dut beste tuitstar bat izan nahi, haien fama poesia mediokrea saltzeko erabiltzen duten horietako bat. Nire ustez, gaur egun olerkigintza oso egoera txarrean dago, eta ez dut fenomeno horren parte izan nahi. Lortu berri dudan fama probestu nahi dut argitaletxeekin kontaktuan sartzeko eta idazten dudana munduari erakusteko, baina ni ez naiz @TheJasier, Hasier baizik.

Herri, ibai eta mendien gaineko hari berri bat egitekoa zarela irakurri dugu. Hala da? Zergatik?
Bai, hala da. Txikitatik bizi izan naiz euskal toponimoen magiaz gozatzen, eta besteekin magia hau partekatzea ideia ona dela uste dut. Are gehiago, hau ez da nire proiektu bakarra, eta euskara ez da nire hizkuntza bakarra. Ingles filologia ikasten ari naiz, C2 maila daukat ingeleraz, eta alemaniera, grekera eta latinera ere ikasten ditut. Hizkuntzalaritzan eta literaturan ere gauza ugari ditut esateko. Beste hari batzuk prestatuko ditut hurrengo hilabeteetan: Abizenen jatorria, birao eta irain interesgarriak munduan zehar, atsotitzak munduan zehar, hizkuntza konkretu batean soilik existitzen diren hitzak… Adi egon eta ez galdu!