Hendaia eta Zokoa artean dagoen errepidea autoz eta jendez bete da. Mila lagun inguru bildu dira Erlaitzako labarretan Belharra olatua ikusteko. Urautsian Tow-in bidez (uretako motoaren laguntzaz) olatu erraldoiak hartzeko prest dauden surflarien artean Candide Thovex aurkitzen denaren zurrumurrua zabaldu da, eskiatzaile famatuak Belharra olatuak eskaintzen duen malda eskiekin jaisteko asmoa zuela jakinarazi baitzuen.
Estatu frantsesean ikasleen oporrak direla eta, azken egunetan bisitari andana dabil Lapurdiko kostaldean, ondorioz, ohikoa baino askoz ere jende pilaketa handiagoak izan dira Erlaitzako errepidean. Bide bazterretan autoak aparkatuta dira nonahi eta mila pertsona inguru daude labarren gainean kataloxekin itsasoari begira eta mugikorrekin argazkiak ateratzen.
Belharra urautsia Erlaitzatik bi edo hiru kilometrora dago eta oso gutxitan lehertzen dira olatuak bertan, zinez itsaski handiak behar baititu ur azalera ateratzen ez den uharte moduko plataforma baten gainean olatuak lehertu ahal izateko. Posible da bi edo hiru urtetan Belharra olatuak leherraraziko dituen itsaskirik ez izatea, zinez itsaski handia behar baita horretarako, horregatik olatua lehertzen denean sekulako oihartzuna izaten du.
Itsaski izugarria
Gaurkoa azken urteetan izan den itsaski handienetako bat da. Euskal Herriko kostaldean lur hartuko duten olatuek Atlantiko osoa zeharkatu dute, eta AEBetako ekialdean izan diren ekaitzen ondorioz sortuak dira, horregatik olatuen arteko distantzia zinez handia da, 20 segunduko tartea dago olatu batetik bestera eta hori zinez arraroa da Kantauri itsasoan. Olatuen arteko distantzia handiak uhin horiek oso urrun sortu direla esan nahi du eta halako ibilbidea egiten duten olatuek energia asko biltzen dute bidean.
Itsasaldi biziak direnean, alegia ilbetea edo ilberria denean, errazagoa izaten da Belharra olatua «esnatzea», itsasbeheran marea asko jaisten denez, urazala eta hondoan dagoen haitz plataformaren arteko distantzia txikiagoa izaten baita. Horrela, sakonera gutxiagorekin uhinak errazago egiten du talka hondoarekin eta olatua lehertzeko aukera gehiago daude. Ordea, gaurkoan, itsasaldiak oso biziak ez izan arren eta sakonera handia izan arren, Belharra olatua erraz lehertzen da, beraz olatuek sekulako garaiera dutela ondorioztatzen da.
Belharrako olatuak forma egokia izateko haizerik hoberena hegoa haizea da, olatua garbi lehertzen baita, horregatik olatu handien zale diren surflari andana pilatu da gaur Urruñako urautsian Uretako motoen bitartez olatuak hartzeko. Belharran bezala, Euskal Herriko kostalde guztian izango dira olatu biziki handiak eta surf egiteko egokiak, baina egun arriskutsua ere izango da gaurkoa, halako olatuetan ibiltzeko oso ongi prestatua izan behar baita.
Itsasgora arratsaldeko 15.30ean izango da eta koefiziente txikia denez marea ez da aunitz igoko, baina itsaskiaren indarrak kalteak eragin ditzake bereziki kolpatuak diren portuetan eta kostaldeko zenbait eremutan.
![Acdc](/media/asset_publics/resources/001/145/041/article_thumb_horizontal/ACDC.jpg)
AC/DC: El origen de una leyenda contada desde los márgenes
![0811_eh_pavel](/media/asset_publics/resources/001/145/092/article_thumb_horizontal/0811_eh_pavel.jpg)
Polonia mantiene abierta la investigación contra Pablo González y podría juzgarlo en rebeldía
![Putin](/media/asset_publics/resources/001/142/722/article_thumb_horizontal/putin.jpg)
La Fiscalía presenta ahora su acusación formal contra Pablo González, liberado hace dos semanas
![Captura_de_pantalla_2024-08-14_a_las_20.40.52](/media/asset_publics/resources/001/146/475/article_thumb_horizontal/Captura_de_pantalla_2024-08-14_a_las_20.40.52.png)
Kaleko saltzaileen aurkako polizia-operazioa Bilboko Areatzan, Aste Nagusiaren atarian
![Donosti_maa4638](/media/asset_publics/resources/001/146/738/article_thumb_horizontal/donosti_MAA4638.jpg)