Hernani da covid-19aren hedapena neurtzeko baheketa egiten ari den azken herria. Astelehenean hasi zen eta asteazkena arte luzatuko dira probak.

Lehenengo egunean jada 770 lagun pasa dira Hernaniko baheketatik, eta prozedurak behar bezala funtzionatu duela nabarmendu eta txalotu du Hernaniko alkateak txio batean.

770 pertsona inguru gerturatu gara gaur PCR probak egitera. Erakundeen arteko elkarlanari esker dena lasai era pilaketarik sortu gabe joan da. Oraindik ere beste bi egun oso dauzkagu proba egiteko. Datu errealak izatea garrantzitsua da kutsatzeak gutxitu ahal izateko. pic.twitter.com/nDmt7wqvWn

— Xabi Lertxundi Asteasuinzarra (@xabilertxundi) November 2, 2020

Polikiroldegian ari dira azterketa hauek egiten, baina hitzordua hartzeko Hernaniko osasun-etxera deitu beharra dago (ikasleek ez, ikastetxeetan egingo baitira). Beste herrietan bezala, 13 eta 40 urte bitarteko auzokideak deituta daude neurketa hau egitera.

Osakidetzak behar-beharrezkotzat jo du behaketa hau, azken bi asteotan pilatutako kutsatze kasuak 100.000 biztanleko 1.094 direlako, asteleheneko datuei erreparatuta, bereziki altua beraz.

Hernaniren ondoan dagoen Urnietak du une honetan EAEko tasa altuena; bertan jada egin zuten baheketa. Beasain, Bergara, Azpeitia, Azkoitia, Gasteizko Sansomendi auzoa, Santurtziko Kabiezesen... toki hauetan guztietan ere egin berri dira proba masibo hauek.