Desberdina izan da astea Sanserentzat Alcorconen garaipena ospatu ondoren. Onerako, poztasunak eta konfiantzak lana errazten dutelako. Eta ohiko gorabeherak ez ahazteko, ez horrenbeste futbolarien erabilgarritasunari dagokionez, hainbat jokalari itzuli diren arren. Aspaldiko partez, Lobete, Romero eta Djouahra bigarren taldearekin daude eta Xabi Alonsok ez du guztiz baztertu Gonzalez de Zaratek Espainiako selekzioaren kanpo utzi duen lesioa gainditzea; dena dela, kontrako bidea jarraituta, Ayesak eta Pokornyk, Turrientesez gain, nazioarteko partida dute eta Roberto Lopez Alcorconen lesionatu zen. Horri eskenatokiaren aldaketa gehitu behar zaio, asteak, berriro ere, aldaketekin osatu duela bere arruntasuna, alegia.

Ez da gauza txarra izan behar, «baldintza desberdinei moldatzen eta ohitzen» ikastea bigarren taldearen jokatzearen prozesuan barruan baitago. Gainera, baliteke txuri-urdinak hilabete gorabeheratsu eta aldakor hauetan ikasten ari direnaren etekina Sansek berak aprobetxatu ahal izatea hemendik gutxira.

Honen harira, Xabi Alonsok argi dauka garaipenak direla «puntuak» eta «konfiantza» ematen ari direnak baina, bere taldeak asko ezin izan baditu ospatu ere, pozik dago haziak hozitzen diren bitartean egiten ari denarekin. «Garrantzitsuena izaten ari da lehiatzen ari garela eta une zailetan hor egoteko gai garela. Partida gehienetan aurkariaren mailan egon gara eta horrek esan nahi digu Bigarren Mailan lehiatzeko gai garela. Falta zaiguna? Dena hobetu daiteke. Argi dago astero gauzak aldatzen ari garela, aurkariengatik, mugimenduengatik… eta horrekin lan egin behar dugula. Nik uste dut denboraldian zehar faseak egon daitezkeela eta badakigu oraingoa guretzat oso exijentea izango dela gauza askorengatik: maila berria delako, jokalariek ezagutu behar dutelako, mugimenduak daudelako gora eta behera… Baina fase honetan ikasteko gai bagara, aurrerapausoak emateko eta pixka bat hezteko, agian lagunduko gaitu hurrengo fase batean hobeak eta sendoagoak izatera».

Bide horren hurrengo urratsa Ponferradinaren aurka eman beharko du Sansek. «Oso talde ona», Alonsoren ustetan. «Ponferradina ikusten asko ikasi dut», adierazi du, izan ere. «Jokalariek oso garbi dute nola jokatu behar duten. Bolok gauzak oso argi ditu eta lortu du berak nahi dituen gauzak egiten ari den talde bat. Horregatik ari dira lortzen emaitza oso onak. Oso maila ona ematen ari dira. Horregatik guretzat oso froga gogorra izango da. Etxean baina etxetik kanpo jokatuko dugu, ea aldaketa hori ere ondo eramaten dugun».

Kasualitatez, bere puntu gehienak etxean eskuratu dituen Ponferradinak etxetik kanpo lortu dituen gol eta garaipen bakarra Ipuruan ospatu zuen, gainontzeko bidai guztietan galdu duen bitartean. Alonsok, hala ere, ez dio ahultasun berezirik ikusten Leongo taldeari bisitari kamiseta jartzen duenean. «Nik bere partidak ikusi ditut etxetik kanpo eta, porrotak jaso arren, ondo jokatu dute, partidan sartuta egon dira, oso maila ona ematen. Argi dago etxean lortu dituztela puntu gehienak baina oso talde on baten aurka jokatzea espero dugu. Jokalariak fisikoki oso onak dira, badakitenak nolakoa den maila hau, garbi dute zer nahi duten, blokearekin oso konprometituta daude, futbol mota desberdinak menperatzen dituztenak, blokea egin duen entrenatzaile on batekin eta garbi dutela zer nahi duten. Froga gogorra eta garrantzitsua izango da guretzat».

Donostiarrek, gutxienez, oso animatuta ekingo diote erronkari, Santo Domingokoak emandako konfiantzari esker. «Sinesmena, gogoa, beti mantendu behar ditugu, emaitzak onak edo txarrak izan», gogoratu du Alonsok baina garaipenek «konfiantza ematen dute. Batez ere irabazteko gaitasuna daukagula berretsi digu. Bagenekien lehiatzen genuela eta gertu geneukala baina hiru puntuen bultzada hartzen duzunean beste gauza bat da; sailkapenarengatik eta gu geugatik. Hala ere, Alcorconen gertatu zena ahaztuta daukagu dagoeneko eta igandean datorkigunean zentratuta gaude».