Glasgowko COP26 goi-bileraren aurrean, sare sozialen bidez kanpaina bat abiatu du Sortuk Euskal Herrian krisi ekologikoa «areagotzen» duten enpresa eta azpiegiturak ezagutarazteko. «Puntu beltz» horien aurrean paratu dira Sortuko hainbat militante ’Ekozidioa gelditu’ leloa daraman kartela erakutsiz.

Klima larrialdiak gizarte-eredu berria planteatzera behartzen gaituela uste du Sortuk, «izan ere, sistema kapitalistak bilatzen duen garapen infinituak kale egin du muga finituak dituen planeta honetan». Horregatik, bestelako eredu iraunkorragoa eraiki behar dela adierazi du. IPCC Klima Aldaketari Buruzko Gobernu Arteko Taldearen txostenak eredu kapitalistari egotzi dio klima aldaketaren ardura eta ohartarazi du «ez dela jasangarria».

«Premiazkoa da beraz ekoizpen eta kontsumo eredua errotik aldatzea. Euskal Herrian eragiten dugun aztarna ekologikoaren arabera, kasik hiru planeta beharko genituzke bizirauteko. Zalantza izpirik gabe, guri Euskal Herritik eragitea dagokigu. Historikoki, borroka ekologistak ibilbide oparoa izan du Euskal Herrian, eta etorkizun hurbilean ere erronka garrantzitsuei aurre egin beharko die, nahiz eta estaturik ez izan, nahiz eta aldaketa horiek gauzatzeko baliabide nahikorik ez izan. Burujabetzaren beharra ere ezinbestekoa zaigu alor honetan», dio alderdi abertzaleak.

Sare sozialetan egindako kanpainan, Euskal Herrian ingurumenari kalterik «handiena» eragiten dituzten enpresak seinalatu ditu: Petronor (Muskiz), Exolum (Ribabellosa), Zabalgarbi (Alonsotegi), Sener (Neguri), FCC, Iberdrola (Bilbo), Energyworks (Gasteiz), REEren zentral elektrikoa (Ezkio-Itsaso), Bahia de Bizkaia (Zierbena), Boroako zentral termikoa (Zornotza), Cementos Rezola (Arrigorriaga eta Añorga), Cementos Portland (Olatzagutia), Cementos Lemona (Lemoa), Smurfit Kappa Group papertegiak (Iurreta, Zangotza), Papelera Guipuzcoana de Zicuñaga (Hernani), Sader (Bilbo), Befesa (Erandio), Magna (Zubiri), Indumetal (Asua) eta Valle de Odieta etxaldea (Kaparroso).

Horiez gain, azpiegiturak ere seinalatu ditu: AHT, Super Surren anpliazioa Bolintxun, Armentia II-ko gas proiektua (Subilla Gasteiz), Zubietako erraustegia eta Verter Recycling honkakindegia (Zaldibar).

Asteburu honetan hasiko da Glasgow COP26 gailurra, larrialdi klimatikoaren aurrean erabakiak hartzeko.

Euskal Herrian ere badugu nondik eta nola hasi. pic.twitter.com/c57GkoZdBE

— SORTU #LehenikHerria #PrimeroLaGente (@sortuEH) October 27, 2021

«Euskal Herrian, ingurumena kaltetu duten enpresa eta azpiegiturak multinazionalen esku daude kasu gehienetan. Ekozidioa eragin dute etekin handiak irabazi dituzten bitartean, langileen bizi-baldintzei erreparatu gabe kasu askotan. Trantsizio ekologikoari heltzeko eztabaida betean, ekozidioa eragin dutenek ordain dezatela exijitzen dugu. Ez dezatela trantsizio ekologiko hori herritarren eta langileen bizi-baldintzak are gehiago prekarizatzeko eta haien mozkinak gizentzeko baliatu. Horregatik, politika ekosozialistak aplikatzeko beharra nabarmentzen dugu, trantsizio ekologikoa modu ordenatuan egiten ez bada kapitalismo basatiena nagusituko delako bestela. Norabide horretan, administrazioek esku hartzea ezinbestekoa da, politika sozialistak aplikatuta, herritar guztien eskubideak babesteko», adierazi du Sortuk.

Klima larrialdia dela eta, herri mugimenduak Euskal Herrian antolatutako mobilizazioetan parte hartzeko deia egiten du: Azaroaren 6an, larunbata, 18:30ean, Bilboko Udaletxetik irtengo da manifestazioa ‘No hay tiempo. Justizia klimatikoa orain’ lelopean. Egun berean, Donostian Kontxako hondartzan egingo da mosaikoa 11:30ean ‘Klima ez da negozioa’ lelopean.