Ertzaintzak 40 urte beteko dituen 2021a hasi berria dela, berriz ere gazteen aurka izan ohi duen jarrera salatzen duten kartelak agertu dira azken egun hauetan, batez ere autobus geltokietako iragarki taulak erabiliz.

Iaz ere horrela gertatu zen eta orduan Ernairen aurka gogor jo zuten Ertzaintzaren zenbait sindikatuk zein Segurtasun Sailak, besteak beste gorroto delitua leporatuz. Larunbat honetan NAIZek argitaratu duenez, duela zenbait hilabete Fiskaltzak baztertu zuen akusazio hori, nahiz eta Josu Erkoreka buru duen sailak ez zuen horren berri eman.

Oraingo honetan agertu diren irudiak ez ditu inork sinatzen. Hala ere, ESAN sindikatuak Ernai seinalatu du ohar batean, eta ekinbide judizialak iragarri ditu «Ertzaintza iraintzen dutenen kontra». ErNEk ere ezker abertzalearen aurka egin du eta ez hori bakarrik, Erkoreka sailburuari «eraso» hauen aurrean «bigunegi» aritzea leporatu dio.

Beranduago Josu Erkorekak kartelak «gorrotoa» islatzen dutela berretsi nahi izan du sare sozialen bitartez, mezu honetan, eta juxtu egun honetan ezagutu den Fiskaltzaren erabakia baloratu gabe:

 Fotos que expresan odio.

 Fotos de quienes siguen anclados en el pasado.

欄 Pero la realidad es tozuda y las cifras reflejan que la @ertzaintzaEJGV es una policía profesional que… ➡️ https://t.co/yxnv7l83SN pic.twitter.com/gzYsZAeRhB

— Josu Erkoreka (@jerkoreka) January 29, 2022

Auzi horren artxibatzea jakinarazi aurretik hasi dira ikusten kartelak euskal kaleetan. Irudi ezberdinak dakartzate, baina guztietan gazteen aurkako oldartzeak agertzen dira. Ertzain gehiago hartzeko kanpaina hartzen dute helduleku gisa, ‘Zatoz euskal poliziara, apúntate a la policía vasca’ leloaren ondoan irudi bortitzak txertatuz. Ia 500 ertzain eta udaltzain gehiago hartzeko prozesua abian da.

Erreakzio batzuk eragin dituzte sare sozialetan kartel hauek, esaterako Eleak mugimenduaren mezu hau:

Eta horrela zure bizitza osoan, han eta hemen injustizia salatzen duten herritarrak jipoituz eta beren eskubideak zapuztuz! pic.twitter.com/pvaLgnLlPG

— Eleak Mugimendua (@EleakMugimendua) January 29, 2022

Lakuako Gobernuak iragarri duenez, urte hau Ertzaintza omentzeko baliatuko du, bere 40. urteurrenare dela eta, oraindik zehaztu ez diren ekimenen bitartez.