‘Maite Peña, bilera noizko?’ oihukatuz sartu dira ostegun honetan ELA eta LAB sindikatuetako kideak Gipuzkoako Batzar Nagusietara Maite Peñaren, Gipuzkoako Gizarte Politikako diputatuaren, agerraldia etenez. Sindikatuetako ordezkariak Gipuzkoako zahar etxeetako langileen aldarrikapenak mahaigaineratzeko, negoziazio kolektiboa aktibatzeko eta Diputazio, patronal eta sindikatuen arteko elkarrizketei ekiteko helburuz aurkeztu dira Peñaren Agerraldian.

Batzar Nagusietara eraman ditugu Gipuzkoako helduen egoitzetako langileen aldarriak #FuntsezkoakBeti #EgoitzakBorrokan

Maite Peña diputatuaren agerraldia eten dugu, helduen egoitzetako hitzarmenaren negoziazioa blokeatuta dagoela salatzeko
👇👇👇https://t.co/kfC22OziDS pic.twitter.com/UyC2jvOl9t

— LAB SINDIKATUA (@LABsindikatua) February 10, 2022

LABek azaldu duenez, Peñak bilera eskaerei ezikusiarena egin dielako sartu dira Batzar Nagusietara: «​​Erresidentzietako egoera benetan larria da eta gehiegi luzatu den gatazka honi irtenbide bat aurkitzeko hamaika bilera eskaera formal egin ditugu dagoeneko eta ez dugu inolako erantzunik jaso Gipuzkoako Foru Aldundiaren partetik». Gainera, LABek patronalaren jarrerari eta Gipuzkoako Foru Aldundiaren «borondate faltari» egotzi die negoziaketak blokeatuta egotearen erantzukizuna.

Ildo beretik, ELAk gehitu du Gipuzkoako adinekoen egoitzetan lau urtez greban egon ondoren egoera «jasanezina» dela, eta zentro horietako «askotan» ez direla «laguntzaileak, erizainak eta medikuak ordezkatzen». «Baldintzak hain dira gogorrak, inork ez duela egoitzetan lan egin nahi», salatu du sindikatuak. Gainera, ELAk azpimarratu du egoitzetako beharginak «fisiko eta emozionalki leher eginda» daudela eta Diputazioak ez duela beraien egoera hobetzeko «deus egiten».

Hori horrela, bi sindikatuek mobilizazioak deitu dituzte datozen egunetarako. Ostiral honetarako, adibidez, ELAk zahar etxeetako beharginei nork bere lantokiaren aurrean protesta egiteko eskatu die. Horretaz gain, bai ELAk eta bai LABek greba egunak deitu dute datorren otsailaren 16rako eta martxoaren 24rako. Hori bai, lanuzteak egun beretarako deitu badituzte ere, sindikatu bakoitzak bere aldetik mobilizatzea aurreikusten du.