EH Bilduren udal taldeak, martxoko Osoko Bilkuran eztabaidatuko den mozio baten bidez, Bilboko Udalari eskatu dio transexualen errealitateari buruzko jardunaldiak antola ditzala, euren bizipenak arlo ezberdinetatik jorratzeko, hala nola hezkuntza, lan arloa, esperientzia pertsonala, kultura, arlo juridikoa eta osasun-arloa.

2009. urteaz geroztik, martxoaren 31n, Trans Ikusgarritasunaren Nazioarteko Eguna ospatzen da, mundu osoan transexualekiko diskriminazioaren aurka sentsibilizatzeko. Bruno Zubizarreta EH Bilduko zinegotziak esan duenez, gaur egun, transexualen inguruko aurreiritzi eta topikoek jarraitzen dute, eta, tamalez, ibilbide luzea geratzen da haien eskubideak erabat aitortzeko.

Koalizio abertzaleak proposatu du jardunaldi horiek urtero antolatzea, eta LGTBI elkarteekin lankidetzan egitea. EH Bilduk proposatu du jardunaldi horiekin batera transexualen ikusgarritasunaren aldeko kanpaina bat egin daitekeela.

Zubizarretak adierazi duenez, antzeko jardunaldiak arrakastaz egiten dira beste hiri batzuetan, hala nola Iruñean. Hiriburu nafarrean Udalak duela urte batzuetatik bultzatzen du ‘Octubre Trans’ izeneko programa. Horren bidez, errealitate transexuala jorratzen da mahai-inguruen, antzezlanen, ipuin-kontaketen eta transexualek ahotsa hartzen duten beste jarduera batzuen bidez.

Ildo horretan, otsailean trans kolektiboaren banderaren koloreak zituen plaka eta banku bat inauguratu ziren Bilbon, berdintasunaren aldeko hiri bat dela adierazteko. Zubizarretaren ustez, ekintza sinboliko hori beharrezkoa da, baina udal mailan beste ekimen batzuk ere antolatu behar dira, Bilbok zalantzarik gabeko babesa eman diezaien hiriko transexualei.

«Hori dela eta, espero dugu gure ekimenak gobernu-taldearen oniritzia izatea, guztion artean gure hiriko transexualak ikusarazteko eta laguntzeko neurriak abian jartzeko», nabarmendu du zinegotziak.