«Durangoko airearen kalitateak kezka handia sortzen digu durangarroi. Zoritxarrez, Durangoko Udalak 2020an aurkeztu zuen usainen azterketak, Iurretatik metro kubikoko 788 mikrogramoko bentzeno-tontorrak zeudela frogatzen zuenak, bai Eusko Jaurlaritzaren estazio mugikorrek 2021ean bildutako datuek kezka hori berretsi zuten», adierazten du mozioak.

Horren aurrean «beharrezko bitartekoak» eskatuko dituzte, «emisio horien jatorria aurkitzeko premiazko neurriak hartzea eta emisio horiei amaiera ematea». Era berean, erakundeen arteko lan mahaien alde egin du, zeinetan mugimendu ekologistetako kideak ere egonen diren.

«Euskal Autonomia Erkidegoan ezarritako legezko mugak Osasunaren Mundu Erakundearen (OME) gomendioak baino handiagoak dira. Erakunde horrek onartzen du, gainera, PM 2,5 partikulen kasuan oso kaltegarriak direla eta oraindik ez dela frogatu gutxieneko atalase bat. Hori dela eta, arlo horretako legeria OMEren gomendioekin berdindu behar da, gutxienez», gehitu du.

Hori dela-eta, diagnostiko berri bati ekitea eskatu dio Lakuari, Durango eta Iurretako udalak prozesu osoaren partaide eginez. Era berean, Euskadiko Airearen Kalitatearen Sarearen parametroak «eguneratzea» defendatuko du, Osasunaren Mundu Erakundeak gomendatzen dituen airearen kalitateari buruzko balioak betetzeko.

Era berean, Gasteizko Parlamentuak 2018ko urriaren 4ko mozioan onartutako akordioak betearaztea eskatuko du Udalak, kutsadurari aurre egiteko herritarren osasuna bermatzeko jarduketa protokoloen ingurukoa.