‘Burujabetza Euskal Herriarentzat’ lelopean, eta EH Bai alderdiaren deiari men eginez, Azkainen elkartu dira ehunka lagun. Bi urtez ezin elkartu egon ondoren heldu da igande honetan berriro ere Aberri Eguna ospatzeko garaia. «Iruñean zein Azkainen erakutsi dugu hemen herri bat badela, zutik eta bizirik eta bere etorkizuneko erronkei heltzeko gaitasunarekin», adierazi dute itxiera ekitaldian.

Alderdiaren aburuz, pandemiak eragindako askotariko krisiak egitate argi bat utzi du beste behin ere agerian: erronka sozial, ekonomiko, klimatiko eta kulturalei aurre egiteko, burujabetza behar duela Euskal Herriak.

«Euskal Herriak erakutsi du indarrak bilduz gauza handiak egiteko gai dela. Azken hilabeteak emankorrak izan dira herri mobilizazioen eta ezberdinen arteko lanaren ikuspegitik», adierazi dute, hainbat adibide aipatuz: euskararen eta murgiltze ereduaren defentsan iaz karrikara atera ziren 10.000 lagun, «laborantza lurren espekulazio bidegabea gelditzeko» Arbonan lau hilabetez okupazioa burutu zen; azaroan, herrian bizitzearen alde, 8.000 lagun mobilizatu ziren Baionan. Eta geroztik, Euskal Elkargoak etxebizitza turistikoen arautzeari ateak ireki dizkio.

Batasun eta borroken hariarekin segituz, beste bi adibide. «Aspaldikoa den AHTaren aurkako borroka ere aipagarria da. Urteetako mobilizazioen logikan, Abiadura Handiko Trenaren aurka bozkatu zuen Euskal Elkargoak». Bestea Euskal preso politikoen auziari dagokio, izan ere, «blokeoen gainetik, Ipar Euskal Herrian gizarte zibilaren eta hautetsien arteko adostasunak indarrean segitzen du».

Gertakari hauek erakusten dute herri mobilizazioak eta instituzioak osagarri direla, defendatu du EH Bai-k. «Eta Ipar Euskal Herrian, indar harremanak, gero eta gehiago bertako arazoen eta interesen arabera osatzen direla. Agerian gelditzen da, haatik, eskumen eta tresna gehiago behar ditugula», erantsi du.

Hala, Aberri Eguna kari, EH Baik honakoa adierazi nahi izan du: «Duela bost urte Euskal Elkargoaren sorrera babestu genuelarik, ezagupen instituzionalerako lehen urratsa zela azpimarratu genuen. Gaur, eskumen handiagoko instituzio bat behar dugula berresten dugu.
Herritarren nahia eta beharrei erantzuteko eta erabakiak bertan hartu ahal izateko».

Gauzak honela, Ipar Euskal Herriak Estatus bereziko Lurralde Kolektibitatea eta botere politiko handiagorat buruz joaiteko erronka duela aldarrikatu du alderdi abertzaleak. «Hori da herri honetan gehiengoz eraiki den adostasuna», gogorarazi du.

«Muga guzien gainetik, Euskal Herri osoko eragile, herritar eta instituzioen artean nazio eraikuntza berrindartzeko garaia dela ere azpimarratu nahi dugu», adierazi du Anita Lopepek.

Anita Lopepek zoriondu ditu "Azkainen bildutako 1.200 lagun horiek". @EHBai k antolaturiko #AberriEguna kari Euskal Herriko agenda aintzat hartzeko exijentzia apirilaren 24an hautatua izanen den frantses presidenteari. Amaitu da ekitaldia. Bazkari herrikoia eta musikaren txanda. pic.twitter.com/fFZwiJZB1s

— Maite Ubiria (@Maite_Ubiria) April 17, 2022

Hauteskundeen emaitzekin kezkatuta

Testuinguru honetan, kezkaz so egiten dio EH Bai-k Estatuko frantseseko egoerari eta presidentetzarako hauteskundeen emaitzei. «Politika neoliberalak, eskuin-muturraren gorakada eta ideologia atzerakoien aitzinean gira», esan du kezkaz.

Hala, apirilaren 24ko hauteskundeetatik aterako den presidenteari «Euskal Herriaren gehiengoaren hitza errespeta dezala exijitzen dio EH Baik. Eta zehazki, euskal presoen egoerari konponbide politikoa emateko lehenbailehen elkarrizketak berrabia ditzala».

Salatu duenez, Korsikan azken asteetako gertakariek «agerian utzi dute» gatazka politikoen erroa herrien aitortza politikorik eza dela. «Eta beraz gatazken behin betiko konponketa ezagupen politikotik etorriko dela». Horregatik, babesa helarazi nahi izan diote Estatu frantsesak «zapalduriko herriei».