Gasteizko epaitegi batek irailean kaleratutako epaia berretsi eta Arkautiko Poliziaren Euskal Akademiari agindu dio bi hilabeteko epean B2 euskara maila ez egiaztatzeagatik deialditik kanpo geratu ziren bitarteko udaltzainen poltsara sartzeko hautagaiak onar ditzala.

UGT sindikatuak helegitea aurkeztu zuen hautaketa prozesu horren aurka, euskararen ezagutza maila egiaztatu ezin zuten izangaientzat «tratu diskriminatzalea» zela iritzita. Hala, sindikatuak epaia irmoa dela iragarri du, Lakuako Gobernuak ez baitu helegiterik aurkeztu.

Beraz, Gasteizko Administrazioarekiko Auzien 2 zenbakiko Epaitegiak Polizia eta Larrialdietako Euskal Akademiari agindu dio epaia betetzeko eta baztertuak izan ziren hautagaiak onartzeko. Joan den azaroan, epaiari men eginez, Lakuak udaltzain izateko eskakizunetatik euskara kendu zuen.

2021eko epaia

Baliogabetu den araudia 2021eko uztailean onartu zuen Lakuak, eta ebazpen baten bidez, bitarteko udaltzainen poltsa batean «onartzeko baldintza» gisa ezarri zen B2 euskara maila egiaztatzea, «ehunka hautagairentzat oztopo gaindiezina», Jose Luis Ahedo UGTko Zerbitzu Publikoetako foru arduradunaren arabera.

Hain zuzen ere, epaiak bertan behera utzi zuen Araba, Bizkaia eta Gipuzkoako udaltzaingoetako bitartekoen poltsa bat sortzeko hautaketa prozesurako deialdia egiten zuen ebazpenaren oinarrietako bat. Lanpostuak bete behar dituztenean, udalek poltsa horretara jotzen dute.

Sententziak ohartarazten zuenez, euskararen B2 maila eskatzeak «funtzio publikoan sartzeko oinarrizko printzipioen aurka egiten du», maila hori egiaztatu ezin duen oro lan poltsatik kanpo uzten baitu, eta horrek «diskriminaziozko tratua» ematen die izangai horiei.

Eginbide judizial berri honekin, Arkautiko Akademiak bi hilabete ditu epaia betearazteko eta bere garaian euskara titulua ez izateagatik kanpoan geratu ziren hautagai guztiak bitartekoen zerrendan onartzeko.