Presoentzat «trabarik gabeko bide bat» martxan jartzea eskatu dute sindikatuek gaur Bilbon egin duten agerraldian. Zehazki, ELA, LAB, UGT, ESK, Steilas, CGT-LKN, CNT, EHNE, Hiru eta Etxaldeko ordezkariak izan dira komunikabideen aurrean.

«Ia 35 urte luze igaro dira urruntze-politika indarren jarri zutenetik. Denbora horretan sufrimendu psikologiko, emozional, ekonomiko eta fisiko ikaragarria eragin du. Askok ezagutu ditugu Puerto edo Curtis, Castelló edo Fresnes. Sakabanaketa horrek astero ehunka kilometro egin behar izatera eraman gaitu, eta ondorio batzuk bereziki larriak eta itzulbiderik gabeak izan dira; nola ahantzi etenik gabeko joan-etorri horietan errepidean hil diren 16 pertsonak», gogoratu dute.

«Baina egoera bortitz horrek euskal gizartearen parte garrantzitsu baten erantzuna eragin zuen; ideologiez harago, hainbat euskal herritar mobilizatu ziren presoen eskubideak ez ezik haien familienak ere urratzen zituen urruntze-politikari amaiera eman ziezaioten eskatzeko. Horrek esan nahi zuenaren jakitun izanik, hainbat lagunek besoz beso lan egin dugu, sufrikario horren bukaera helburu», gaineratu dute.

Sindikatuen aportazioa

Bide horretan sindikatuek ere lan egin dutela gogoratu dute. «Guk ere, duela asko hartu genuen, kontsentsu orokor horren atzean, pausu bat eman eta jarrera aktiboa izateko hautua. Hamaika mobilizazio orokorretan hartu dugu parte elkarrekin, eta azken urteetan hilero egon gara Moyua plazan euskal presoek bizi dituzten eskubide urraketak salatzeko», azaldu dute.

Gauzak horrela, 2023. urtearen hasieran urruntze-politikaren amaieran egotea txalotu dute. «Gaur berriz elkartu gara bide horretan. Lortutakoa nabarmendu nahi dugu, eta bidearen azkenera arte lanean jarraitzeko konpromiso irmoa erakutsi. Izan ere, oraindik bide luzea geratzen da aurretik. Presorik gehienak Euskal Herrian daude, bai. Zama handia kendu dugu gainetik, baina salbuespen-politikak indarrean jarraitzen du. Horregatik, trabarik gabeko bide bat aldarrikatzen dugu, gradu-aldaketak eta espetxe-baimenak salbuespenik gabe ezar ditzatela; legeak dioena bete dadila, ez diezaietela presoei legez dagokien eskubiderik ukatu edo murriztu», aldarrikatu dute.

Hori dela eta, elkartzen jarraitzeko asmoa dutela nabarmendu dute, «egiazko bizikidetza lortzeko urratsak egin nahiak batzen gaituelarik».

Lanean jarraitzeko beharra

«Azken urteotan bezala Euskal Herritik lanean jarraitu behar dugu denok, etxerako bidea legeak dioenaren arabera gauza dadin. Irudia moldatu dugu. Ez dugu maparik behar, baina, geziek erakutsi diguten bideari jarraikiz, Etxera Bidea Gertu mezua egia bihurtzen hasteko unea da. Irudi hau bazter orotara hel dadin nahi dugu, denok barnera dezagula, etxerako bidea oztopatzen duten salbuespen-neurriei amaiera emanik», adierazi dute datozen ekaineko, iraileko eta abenduko hirugarren ostiraletan Bilboko Albia lorategietan elkarretaratzea egingo dutela iragarriz.

Bertan, «egun oztopoak jartzen dabilen Entzutegi Nazionaleko Fiskaltzaren jarrera eta honek dakartzan erregresioak ere» salatuko dituztela aurreratu dute.