«Emakumeak gora!» da Emakumeen Nazioarteko Egunaren aurtengo Lakuako Gobernuaren eta Emakunderen kanpainaren leloa. Lelo horrek aldarrikatzen du gizarteak emakume gehiago behar dituela erabaki eta lidergo postuetan eta, horretarako, emakumeek beren ahalmen guztia berdintasunean garatu ahal izateko baldintzak sortu behar direla.

Kanpainaren aurkezpenean izan dira Nerea Melgosa Lakuako Berdintasun, Justizia eta Gizarte Politiketako sailburua; Miren Elgarresta Emakundeko zuzendaria; Gorka Urtaran Gasteizko alkate eta Eudeleko elkarteburua; Nerea Isasi, Ainhoa Campo eta Patricia Campelo, Gipuzkoako, Arabako eta Bizkaiko Berdintasun zuzendariak, hurrenez hurren; eta Nekane Alonso eta Ane Oyarbide, Bilboko eta Donostiako Berdintasun zinegotziak.

Nerea Melgosaren hitzetan, «gizarte honek emakume gehiago behar ditu erabaki eta eragin postuetan eta kanpaina honetan erakusten dugu zein diren emakumeei lidergo postu horietara berdintasunez iristea eragozten dieten oztopo nagusiak». Hala, kanpainak mito faltsuak eraisten ditu, hala nola emakumeak ez daudela hain prestatuta postu horiek betetzeko. Izan ere, EAEn goi mailako ikasketak dituzten pertsona guztietatik, emakumeak ia %60a dira.

Kanpainaren protagonistak hainbat emakume dira, berdintasun ezari buruzko zenbait datu gogorarazten dizkigutenak eta horiek eragiten dituzten arrazoietako batzuk erakusten dituztenak. Esaterako, «emakumeak gerentzia postuen %6a baino ez izatea ez da prestakuntza edo lidergo faltagatik, erakundeetan pribilegio eta rol maskulinoak betikotzen direlako baizik»; «emakumeak titulazio teknikoetako matrikulen %23a baino ez izatea, ez da bokazio faltagatik. Baizik eta, besteak beste, gure erabakiak mugatzen dituzten estereotipoetan oinarritutako hezkuntzaren emaitza»; «zaintzeko eszedentzien %73a emakumeek hartzea ez da emakumeek bakarrik dakitelako zaintzen. Gizarteak rol hori ezartzen digu eta honek gure garapen profesionala mugatzen du».

Sailburuaren hitzetan, emakumeek erabakiak hartzen diren guneetara heltzeko dituzten oztopoetako batzuk dira hauek, batzuetan ikusezinak edo hautematen zailak diren hesiak, hala nola, kristalezko sabaiak, zoru itsaskorrak, zaintza-lanen gainkarga, konfiantza arrakala, rolak eta estereotipoak…

Melgosak zailtasun horietako batzuk zerrendatu ditu, tartean «boterea gizonen kontu gisa ikusten jarraitzen dugula; emakumeei perfekzioa eskatzen zaiela erantzukizun postuetara iristeko (eta euren buruei eskatzen diete ere); haurrek oraindik ere jasotzen dituzten mezuetan mutilen lidergoa indartzen dela; edo anbizioa sozialki zigortuagoa dagoela emakumeen artean».

Bestalde, Emakundeko zuzendari Miren Elgarrestak kanpainaren datuetan eta kontzeptuetan sakontzeko sortu den webgunea aurkeztu du. «Urrats bat eman nahi izan dugu eta kontzeptu batzuetan gehiago sakondu, laguntzen baitigute ulertzen zergatik emakumeei zailagoa egiten zaien iristea eta ardura postuetan mantentzea», esan du.

Webgunean, kanpainako emakume hainbat kontzeptu azaltzen dituzte, horietaz ari garenean zer esan nahi duten ulertzeko. Elgarrestak azaldu duenez, kanpaina kalean ere islatuko da, zenbait puntutan jarriko diren eskailera moduan, eta berdintasun ezari eta emakumeak emakume izateagatik oztoporik gabe igotzeko beharrari buruzko datu batzuk gogoraraziko dizkigute.

Webguneaz gain, kanpainak kartelak, irrati iragarkiak, bannerrak eta iragarkiak ditu, eta otsailaren 27tik martxoaren 14ra bitartean egingo da, kanpoko euskarrietan, komunikabideetan eta sare sozialetan. Gainera, kartelak bidali dira erakundeetara, ikastetxeetara, osasun zentroetara, elkarteetara, enpresetara, kultur etxeetara eta liburutegietara, etab. Halaber, sare sozialetan #emakumeakgora traola erabiliko da.

Elgarresta, M8 jai egun izateko proposamenarekin, harrituta

Bestalde, kanpainaren aurkezpenean, Miren Elgarrestak harridura adierazi du bigarren lehendakariordea den Idoia Mendiak egin zuen proposamenarengatik. Izan ere, Mendiak 2024an martxoak 8 jai eguna izatea eskatu zuen Emakunderi inolako kontsultarik egin gabe.

Gai honek gogoeta bat eskatzen duela uste du Elgarrestak, eta gizartearen babes zabala aurrera atera ahal izateko. Edonola ere, uste du Emakunderen eta mugimendu feministen iritziak kontuan hartu behar direla, «alde onak eta txarrak aztertzeko, eta iritzi publikora aurkezteko modurik onena erabakitzeko».