Deustuko Unibertsitateak Juan Jose Etxeberria Sagastume Zuzenbide Fakultateko irakasle titular eta Unibertsitate Elkarteko eta 2030 Agendako errektoreordea izendatu du errektore, gobernu kontseiluak proposatu ondoren eta Kultura eta Hezkuntzarako dikasterioaren oniritziarekin.

Hirugarren eta azken agintaldia bukatu duen Jose Maria Guiberten lekua hartuko du Etxeberriak. Guibertek Boston College-ko 'Gasson Chair' kargua beteko du 2023-2024ko ikasturtean. Errektore berriaren kargu hartzearen data laster jakinaraziko da, Deustuko Unibertsitateak ohar batean adierazi duenez.

Juan Jose Etxeberria (Tolosa, 1966) 1984an sartu zen Jesusen Lagundian eta 1995ean apaiztu zen. Deustuko Unibertsitatean, Parisko Institutu Katolikoan eta Erromako Gregoriar Unibertsitatean egin zuen prestakuntza akademikoa. Erroman Zuzenbide Kanonikoan doktoratu zen.

Zuzenbide Fakultateko irakasle titularra da, eta Zuzenbidearen Filosofia irakasten du. Loiolako Probintziako jesuiten probintziala izan zen 2008tik 2014ra, «Espainiako probintzian» Estatuko jesuita desberdinak bakar batean bateratu ziren arte. Aurretik, Zuzenbide Fakultateko dekanorde eta Izaera eta Misioko errektoreorde izan zen.

2015etik Deustuko Unibertsitatean kargudun

2015etik hainbat kargu izan ditu Deustuko Unibertsitatean, hala nola Unibertsitate Elkarteko errektoreorde. Era berean, Zuzenbide Naturala eta Zuzenbide Kanonikoa irakasgaiak eman ditu Deustuko Unibertsitatean, Eliz Elkarteen Zuzenbidea Erromako Unibertsitate Gregoriarrean eta Adiskidetze Sakramentuaren Zuzenbidea Pariseko Sevres Zentroan.

Jarduera akademikoarekin batera, jesuita gazteen formakuntzaz eta hainbat pastoraltza jardueraz arduratu da, akonpainamendu pertsonalaren eta inaziotar espiritualtasunaren ingurukoak batez ere. Boluntario gisa lan egin izan du hainbat gizarte proiektutan Parisen, Erroman eta Bilbon.

Etxeberria irakasleak Zuzenbide Kanonikoan eta Zuzenbidearen Filosofian argitalpenak ditu, eta bereziki nabarmentzekoak dira bizi testamentuei, eliz mugimenduei eta gizarte testuinguru berrietan laikotasunaren eta konfesionaltasunaren ikuspegi juridikoari buruzko ekarpenak. Jorratu dituen beste gai batzuk inaziotar espiritualtasuna, Espainiako jesuiten probintzien integrazio prozesua eta Elizako unibertsitateen ebanjelizatzeko erronka dira, besteak beste. Euskara, gaztelania, ingelesa, frantsesa eta italiera dakizki.