«Herri honetan ondo dakigu zer dakarren Mozal Legeak, beraz, ez, ezin da onartu eskubideak eta askatasunak murrizten jarraitzen duen Mozal Lege berri bat». Hala adierazi du Jon Iñarrituk, EH Bilduko Kongresurako Gipuzkoako hautagaiak, Iruñean egindako ekitaldi batean.

Bertan azaldu duenez, «PPk inposatutako askatasun murrizketa pairatzen jarraitzen dugu, eta egungo Gobernuak betikotu egin du Mozal Legea». Izan ere, «lege hori indargabetzeko konpromisoa hartu genuen bloke aurrerakoieko indar guztiok, Espainiako eskuindarrek izan ezik. Saiatu gara. Mozal Legetik adierazpen askatasunaren aurka milaka euskal herritarri aplikatu zaizkien guztiak kentzen ahalegindu gara. Nekaezin egin dugu lan horren alde. Baina ez ziguten entzun nahi izan, eta emandako hitza ez betetzea erabaki zuten».

«Mozal Legearen okerrena mantentzearen alde egin zuten Gobernuko indarrek eta beste alderdi batzuek, baita herri honetakoek ere, Mozal 2.0 Legea onartzeko modukotzat jo baitzuten», gaineratu du Iñarrituk, eta nabarmendu du EH Bildu ez dela «inoiz egongo funtsezko aurrerapausoa ez dakarren akordio batean».

Beraren esanetan, «deskafeinatutako eta funtsezko aurrerapenik gabeko lege bat onartzen bada, badakigu urteak eta urteak beharko ditugula lege hori zuzentzeko. Eta kaltetuenak euskal herritarrak dira». «Beste batzuek azaldu behar diete herri honetako jendeari nola eta zergatik utzi duten hori gertatzen», esan du EAJren jarrera kritikatuz. 

«Mozal legea indargabetzea aurreko hauteskunde orokorretako hauteskunde kanpainan adostasun politiko oso zabala bazen ere, PSOEtik EAJra, batzuek ez dute hitza hartu eta indargabetu egin dute», nabarmendu du.

«Indar gehiago behar dugu»

Iruñean izan da ere Bel Pozueta Kongresurako Nafarroako zerrendaburua. Honek gogoratu duen bezala, «hemen ondo dakigu zer ekarri duen eta zer dakarren eskubideak eta askatasunak murrizteak. Badakigu zer ekarri duen Mozal Legea milaka pertsonari neurrigabe aplikatzeak adierazpen, bilera edo manifestazio askerako eskubidea erabiltzeagatik».

«Asko dira isuna jaso duten nafarrak eta euskal herritarrak, gomazko pilotengatik erasotuak edo adierazpen askatasunerako eskubideak erabiltzeagatik erasotuak. Eskubide horiek gaur egun ere ez dira errespetatzen, Espainiako Gobernuak uko egin baitzion indargabetzeari. Ez dugu etsi eta ez dugu onartzen, horregatik ahaleginduko gara berriro, aldarrikatu du.

Eta «berriro ahalegina egin behar dugula» berretsi du: «Gogor lan egingo dugu berriro Espainiako Gobernua behartzeko, oraingoan bai, Mozal Legea eta haren artikulu kaltegarri guztiak indargabetzera. Berriro diot, jendearen eta haien askatasunen aurkako alderdi guztiak indargabetzeko lan egingo dugu. Horregatik, indar gehiago behar dugu, gehiago izan, Gobernua eta Mozal Legearen makillaje hutsarekin konformatzen diren euskal eta nafar indarrak gehiago mugitu ahal izateko».