Duranako ikastolako guraso, ikasle eta irakasleek elkarretaratzea egin dute Gasteizko Andra Mari Zuriaren plazan, jantokietan kalitatea eskatzeko, menuetan mikroorganismoak eta zizareak detektatu ondoren.

Elkarretaratzean Lakuari «konponbide» bat eskatu diote. Berria jakin zenean Lakuako Hezkuntza sailak Serunion enpresari «menuak hobetzeko» eskatu ziola adierazi zion Efe agentziari, baina gaur guraso, ikasle eta irakasleek pauso bat gehiago emateko eskatu diote EAEko Gobernuari.

Zentzu horretan «konponbidea deuseztapena», «harrik gabeko menu osasuntsuak» edo «hazteko jan egin behar dute» bezalako mezuak helarazi dituzte, Lakuari zuzenduta.

Hezkuntza Sailak Serunion enpresari zigor ekonomikoa ezarriko diola baieztatu zuen. Enpresak ohar batean azaldu zuenez, gertakari hori, antza denez, irailaren 22an Errioxako zentro batzuetan antzemandako bera da. Bertan, larbak aurkitu zituzten pastan, eta, horren ostean, platerak «premiaz» ordezkatu zituzten.

Auditoretza bat egin ondoren, enpresak egiaztatu zuen larba horren jatorria orain arte produktua banatzen zien hornitzailean dagoela, «lehen markakoa eta edozein supermerkatutako linealean aurki daitekeena».

Hautemandako larbak eltxo txiki batenak omen dira, eta pastan eta lekaleetan hezetasun baldintzetan ugaritzen dira. Horrela, «gordinik hautemanezinak dira, eta produktua egin eta zerbitzatu ondoren identifikatzen dira». Enpresaren arabera, ez dira osasunerako kaltegarriak.