Palestinari elkartasuna adierazteko hamarka lagun bildu dira larunbat honetan Donostiako erdigunean. Bildutakoek Israelen aurkako boikota aldarrikatu dute baita ere.
Donostiako BDZ nodoak azaldu duenez, bi hilabete igaro dira Israelen erasoa hasi zenetik, eta 20.000 palestinar baino gehiago hil dira dagoeneko. Izugarrikeria honen aurrean, elkarretaratzean parte hartu duten lagunek «Palestinako herriaren aurkako genozidioa» salatu dute, «astakeria» honen aurka agertu dira, eta erasoa gelditzeko eskatu dute. Era berean, elkartasuna modu «aktibo« batean adierazteko deia egin dute.
Gernika-Palestina herri ekimena
Bestetik, Gernika-Palestina herri ekimenak Elkartasun Aktiboa izeneko iniziatiba aurkeztuko du datorren asteazkenean Bilboko La Bolsa eraikineko ganbaran izango den agerraldian. Bertan izango dira Eneko Gerrikabeitia (Mundubat Gobernuz Kanpoko Erakundea) Agus Hernan (Gernika-Palestina herri ekimena) eta palestinar ordezkari bat.
Herri ekimenak gutxienez 20.000 pertsona bildu nahi ditu bi ardatz nagusi izango dituen kanpainan parte har dezaten: Benjamin Netanyahu nazioarteko epaitegien aurrean eramateko; eta Gazako herritarrei Mundubat GKE-ren bitartez laguntzeko.
Herritarrek Palestinako bandera denda, etxe, ikastetxe, auto edota enpresetan jartzeko deia ere egingo dute.
Cementerio de Santa Ifigenia, lugar de descanso de las grandes figuras de la historia de Cuba
Un perfil que vincula solidaridad con inseguridad, ¿quién está tras la concentración de Egia?
«Urteak daramatzat etxean lan onak egiten, eta plazan erakutsi nahi nuen noizbait behintzat»
Más de 60 bomberos vascos parten «por fin» hacia València
