Jendetza bildu da larunbat honetan Galdakaon aste honetan ezagutu diren sexu erasoak salatzeko. Mugimendu feministak antolatu du elkarretaratzea erasotzaileei mezu bat bidaltzeko: «Galdakaon zuen biolentziak ez dauka lekurik! Aurrean izango gaituzue!».

Asteazkenean Ertzaintzak jakinarazi zuenez, 37 eta 21 urteko bi gizon atxilotu dituzte Galdakaon sexu-erasoak eta intimitatearen aurkako delituak egotzita. Sei adingaberi opariak eskaini zizkieten sexu-harremanak izatearen truke.

Ertzaintzaren Ikerketa Kriminaleko eta Polizia Judizialeko Burutzako Pertsonen aurkako Delituen alorretik hasitako polizia ikerketen ondorio dira atxiloketa hauek, gutxienez bi helduren sexu-erasoen biktima izan daitezkeela jakin ondoren.

Antza denez, gertakariak 2023ko otsailean hasi ziren erregistratzen. Egindako ikerketen arabera, biktimek, guztiak adingabeak, sexu-harremanak izan zituzten bi gizon horiekin, eta, horregatik, hainbat opari jaso zituzten.

Zenbait kasutan, biktimak ustez behartuak izan ziren bi inplikatuen arteko edo haiek beste adingabe batzuekin izandako sexu-harremanak ikustera, eta sexu-harreman horiek ere grabatzen zituzten.

Lehen atxilotua Bilboko Instrukzioko 10 zenbakiko Epaitegiaren esku utzi zuten, eta han agindu judiziala eman zuten aske utzi eta biktimengandik urruntzeko. Bigarren atxilotua ostegun honetan geratu da aske, kontrol judizialpean.