Apirilan sartuta, denboraldiko hilabete oso garrantzitsu batean murgilduta dago Bidasoa Irun. Asobal Ligako bigarren postua oso gertu dute gipuzkoarrek, baina oraindik ziurtatu behar dute azken sei jardunaldietan. Asteburu hau gakoa izan daiteke erronka horretan. Izan ere, Jacobo Cuetararen jokalariek jaitsiera oso gertu duen Sinfinen aurka jokatuko dute larunbat honetan Artalekun (16.00), eta atzetik jarraitzen dion Granollersek hitzordu zaila –ezinezkoa ez esatearren– du Liga txapeldun izan daitekeen Barçaren aurka (18.00).

Edozein egoeratan, logikoena litzateke katalanen arteko neurketan berdinketa bat ematea nahi izatea. Baina Barça boteretsua tartean egonda, eta irundarrekin gol aldea irabazita dutela ikusita, aspaldi da Bidasoa Irunek bigarren postua duela helburutzat. Beraz, Sinfini irabazi eta Granollersek galtzea espero dute Artalekun, nahiz eta horrek Barçari titulua emango liokeen.

Gipuzkoarrek berdinketa polemikoa lortu zuten aurreko jardunaldian, hain zuzen ere Granollersen aurka. Atean sartu ez zen baloi batean gola eman zuten epaileek katalanen alde. Horregatik, talde gipuzkoarrak ohar bat kaleratu behar izan zuen astean zehar Kopan Azken Faserako sailkapena lortu ondoren.

Hori bai, Fundacion Agustinos Alicanteren garaipenak beste albiste txar bat ekarri zuen, Julen Mujikaren lesioa. Jokalari gazteak ubeldura bat izan zuen ezker eskuan eta azterketa erradiologikoa egin ostean, laugarren metakarpianoko haustura zeiharra duela ikusi da. Errekuperazio-denborak eta jarduerara itzultzeak bilakaeraren araberakoak izango direla jakinarazi du klubak.

Orain begirada beste puntu batean dago: Sinfin. Cuetararenak kontuak egiten hasi dira. Artalekun jokatu beharreko hiru partidak irabazita, Ligako hirugarren postua ziurtatuko lukete. Baina gehiago nahi dute; eta horrek esan nahi du, etxetik kanpo beste laugarren garaipen bat lortuta, bigarren postua beraientzat izango litzatekeela.

Prestatzaile asturiarrak argi du Artaleku «gakoa» izan behar dela txapeldunorde izateko. «Gainean dugun desgastea eta nekeari aurre egiteko, zaleek extra bat eman diezaguten behar dugu», eskatu du Cuetarak ostiral honetan.

Entrenatzaileak azken partidak ditu Bidasoa Irunen denboraldi amaieran klubetik irten aurretik. Aste bikaina baloratu du, Granollersen aurkako puntua «urrezkoa» izan baitaiteke bigarren postua lortzeko, eta Kopan «tranpazkoa» izan zitekeen partida horietako batean irabazteagatik.

Aurkaria beheko postuetan dago, baina horregatik hain zuzen ere arriskutsuagoa izan daitekeela adierazi du. «Gure aurka jokatzeagatik presioa ken lezakete, gehienbat partidan zehar aukerak ikusten badituzte», azpimarratu du Cuetarak.