Steilas, ANPE, Afapna, LAB, CCOO, ELA eta UGT Irakaskuntza Publikoko irakasleak ordezkatzen dituzten sindikatuek oso positibotzat baloratu dute Nafarroako irakasleek joan den urriaren 29an egindako greba egunaren jarraipena, eta defendatzen dituzten aldarrikapenei hezkuntza komunitateak emandako babesa.

Irakasleen haserrea mobilizazioetan izandako parte-hartzearen hazkunde nabarmenean islatu dela diote. Hezkuntza maila guztietako milaka irakaslek egin zuten bat grebarekin, eta Iruñean eta Tuteran goizeko manifestazioetan eta Iruñean arratsaldekoan parte hartu zuten.

Era berean, deitoratu dute Nafarroako 2025eko aurrekontuetarako akordioak, grebaren egunean bertan sinatu zenak, ez duela jasotzen irakaskuntza sektorearen eskaerei erantzuten dien partida ekonomikorik.

Azaroaren 11rako Negoziazio Mahai Sektorialera deitu dituztela jakinarazi dute, nahiz eta sindikatuek lehenago biltzeko eskatu. Hala ere, gai zerrenda aldatzea lortu dute; sindikatuek aurkeztutako azken proposamenari erantzun bat ematea eta Carlos Gimenok zuzentzen duen Departamentuaren aldetik proposamen edo neurrien aurkezpen zehatza egiteko konpromisoa. Hasiera batean, deialdia proposamen horiek aztertzeko eta baloratzeko baino ez zen.

Sindikatuetako ordezkariek irakasleen arazoak konpontzeko elkarrizketarako eta negoziaziorako prestutasun osoz jarraitzen dutela nabarmendu dute. Hala ere, iragarri dute mobilizazioak areagotuko dituztela negoziazioan aurrerapausorik ez badago. «Oraindik garaiz dira aurrekontuetan partida ekonomikoak jasotzeko, irakasleen eskaerei erantzuteko eta hezkuntza publikoaren kalitatea hobetzeko», azpimarratu dute.