Euskal arrantza sektorearentzat «kolpe berri bat suposatzen du» 2025erako Europako Arrantza Akordioak, asteazkenean jakinarazitakoa, EH Bilduren aburuz, eta horregatik interpelazioa luzatu dio Europar Batasunari.

«Zehazki, berdelaren kuota %22 murrizteko erabakiak eragin nabarmena izango du euskal flotan, bai baxurako, bai alturako flotan. Norvegiako, Islandiako eta Feroe Uharteetako (arrain-mota horren jatorrizko eremuak) flotek, berriz, espezie hori arrantzatzen jarraitzen dute, inolako murrizketarik gabe», nabarmendu du EH Bilduk.

Bere ustez, «Europar Batasuneko uretan egiten diren harrapaketak arautzen dituen Europako akordioak, euskal flotari neurriz kanpoko mugak jartzeaz gain, arrantzaleen egoera larriagotzen du, lehia desleialaren ondorioz. Ipar Atlantikoan, hirugarren herrialdeetako flotek berdela gehiegi ustiatzeak nabarmen murrizten du Kantaurira iristen den espezie horren kantitatea. Gainera, herrialde horietan egindako harrapaketak, kuotarik ordaindu behar ez dutenez, Europako merkatuan merkaturatzen dira lehentasunezko baldintzetan, gure arrantzaleei zuzenean kalte eginez».

«Lehia desleiala»

Hau guztia dela eta, eta kaltetutako kolektiboekin bildu ostean, Pernando Barrena EH Bilduren eurodiputatuak Europako Batzordeari zuzendutako bi galdera erregistratu ditu. Hau da lehena: «Europako Batzordeak ba al daki Ipar itsasoko berdel-arrantzaren gehiegizko ustiaketa-egoera horren berri, bai eta euskal flotaren harrapaketa-itxaropenei egiten dien kaltearen berri ere, eta, gainera, harrapaketa horiek EBn merkaturatzen direla eta Europako harrapaketekiko lehia desleialaren arazoa eragiten dutela?». Eta horrekin batera, «Islandiak, Norvegiak eta Feroe Uharteek berdelaren arrantzaren gehiegizko ustiapena eta berdela Europar Batasunean banatzeko lehia desleiala arintzeko edozein motatako neurriak hartzeko asmorik ba al du Europako Batzordeak?», jakin nahi du.

Galdera hauen bidez, Europako Batzordeari, egoera honi amaiera emateko eta arrantzaleei bidezko tratua bermatzeko, neurri zehatzak har ditzala eskatzen dio ezkerreko indar abertzaleak.

«Europar Batasuneko ontzidiei alde bakarreko murrizketak ezartzeak, beste herrialde batzuei mugarik gabe jarduten uzten zaien bitartean, gure sektore txikiaren ekonomiari eragiteaz gain, berdelaren epe luzerako iraunkortasuna arriskuan jartzen du», berretsi du EH Bilduk. «Gure arrantzaleek zorrotz betetzen dituzte EBk ezarritako kuotak, eta Norvegiako, Islandiako eta Feroesoko ontziek, berriz, espezie hori inolako kontrolik gabe ustiatzen jarraitzen dute. Gure itsasoen eta haien biodibertsitatearen kudeaketa jasangarria benetan lortu nahi bada, desoreka hori zuzendu egin behar da, baliabide txikien banaketa bidezkoa dela ziurtatuz»