Haurreskolak Partzuergo Publikoak eta esparru horretan gehiengoa duen LABek lan hitzarmen berria sinatu dute. 2026ko abenduaren 31ra arteko iraupena izango du eta indarrean jarraituko du berri bat izenpetu arte, sindikatuak jakinarazi duenez.

Ohar batean azaldu duenez, «osotasunean» berritu dute lan hitzarmena, hamasei urteren ondoren eta azken urteetan «hamaika greba eta mobilizazio burutu ostean». «Beste behin borrokak merezi duela baieztatu dugu», nabarmendu du.

Hitzarmenak, besteak beste, urteko lanaldian 100 orduko jaitsiera jasotzen du, «lan zama arintzeko hainbat neurrirekin batera». Hala, ikasturtean 6 jai egun gehiago izango dituzte Haurreskolak Partzuergoko langileek 2025-2026 ikasturtetik aurrera; kudeaketa alorreko langileen soldatak administrazio orokorrekoekin parekatuko dira, «osagarriak eguneratu eta gizarte funtsa eta formakuntza funtsak lortu ditugu». Aseguruen primak igo eta «lana eta bizitza uztargarri egiteko» hainbat lizentzia eta baimen berri ere jasotzen ditu, Hezkuntza Saileko hezitzaileek dituztenekin parekatuz. Lan osasunean hobekuntzak, berdintasun protokoloak eta formakuntzan hobekuntzak ere jaso dira, LABen arabera.

Esan duenez, hobekuntza horiei iaz lortutako bi akordioak ere batu behar zaizkie, negoziazio honen baitan eginak eta orain lan hitzarmenean txertatu direnak.

Akordioak aurreikusten duenez, hezitzaileen lanpostuen zerrenda 64 postutan handituko da, «behin behineko kontratu kopuru hori estrukturala bilakatzea lortu dugulako; beste horrenbeste lortuko ditugu negoziazio honen ondorioz».

Horrekin batera, behin behinekotasun tasa gehienez %5era mugatzea jasotzen da eta «hurrengo oposizio eredua negoziatu eta adostea».

«Ordezkoen araudi berria adostea eta lan hitzarmenean jasotzea lortu dugu, baita behin behineko lanpostuak telematikoki betetzeko aplikazioa (ordezkagunea) 2025eko irailaren 1etik martxan jarriko dela jasotzea ere», azaldu du.

LABek nabarmendu duenez, «garaipen» honek ez die soilik lan baldintzei eragiten, «haurrei ematen diegun hezkuntza zerbitzuan eragina izango du, 0-3ko dekretuak zehazten dituen ratio murritzak alboratu ditugulako». Gainera, plantillak esleitzeko irizpideak negoziatzeko egutegia eta aldagaien dokumentua sinatu dituzte.

Sindikatuak adierazi du lanean jarraituko duela «Haurreskolak Partzuergo publikoa ardatz, 0-3aren udal eskaintza bateratua lortu arte».

Otsailaren 12 eta 13ko grebak, bertan behera

Horrenbestez, bai LABek bai Steilasek bertan behera utzi dituzte haurreskoletan otsailaren 12 eta 13rako deituta zeuden greba egunak.

Steilasen iritziz, nolanahi ere, Haurreskolak Partzuergoarekin hitzartutako baldintzak ez dira nahikoa, Haizea Arbide sindikatuko ordezkariak Europa Pressi adierazi dionez. Hezkuntza publikoko beste sektoreetan –irakasleak, sukalde eta garbiketako langileak– deitutako lanuzteei eutsi egiten die sindikatu horrek.

Haurreskoletan ordezkaritza duen hirugarren sindikatuak, ELAk, agerraldia eskainiko du astearte honetan LABek erdietsitako akordioari buruzko iritzia emateko.

Pedrosa sailburua, pozik

Lakuako Gobernuko Hezkuntza Sailak, bere aldetik, esan du LABekin sinatutako akordioari esker Harurreskolak Partzuergoak «etorkizunerako zerbitzu egokia» bermatuko duela. Begoña Pedrosa Hezkuntza sailburua pozik agertu da lortutako akordioarekin. Ohar batean, «gogobeteta agertu da bi aldeen arteko elkarrizketak akordio batera eraman baitu», eta nabarmendu du akordio horri esker Haurreskolak Partzuergoak «bere helburua familientzat zein hezitzaileentzat berme eta kalitate osoz garatzen» jarraitu ahal izango duela.

Gaur egun, Haurreskolak Partzuergoko Araba, Bizkai eta Gipuzkoako zentroetan 6.508 haur eta 1.800 langile daude. Azken horietatik %98 zuzenean neska-mutilekin lan egiten duten hezitzaileak dira. 2023-2024 ikasturtean ezarritako doakotasunak matrikulazio kopurua %25 handitzea ekarri du. Familiek beren seme-alabentzat eskatzen dituzten arreta-orduen kopuruak ere gora egin du.