«Gaurko argazkia eta Aietekoa bateraezinak direla» ohartarazi die hainbat sindikatuk Urkulluri

LAB, ESK, STEE-EILAS eta Hiru sindikatuek «prozesuaren alde egiten duen edo Rajoyren esanetara jarraituko duen» erabakitzeko eskatu diote Iñigo Urkullu lehendakariari. Beraien aburuz, gaur Ondarroan ikusitako argazkia eta Aietekoa «bateraezinak» dira.

LAB, ESK, STEE-EILAS eta Hiru sindikatuek Ondaroan gertatutakoa salatu dute eta Urtza Alkortari eta bere senide eta lagunei elkartasuna adierazi diete. Ertzaintzak izandako jokaerak «krudelki gogora ekarri dizkigu iragazko argazkiak», adierazi dute ohar bidez, eta Ertzaintzak zein Urkulluren eta Madrilgo gobernuek «iraganeko errezetekin tematuta jarraitzen dutela» salatu.

«Urkullu jaunak badaki gaurko argazkiak eta Aietekoak bateraezinak direla; Urkullu jaunak badaki gaurko argazkiak ez duela Euskal Herriko jendartearen gehiengoaren babesa, ireki den eskenatoki itxaropentsuaren aurrean jarrera oztopatzailea erakusten duelako», esan dute.

Beraien esanetan, Euskal Herrian irekitako aro politiko berriaren aurrean, Gobernu espainolak eta Gasteizko Exekutiboak «jada buru-belarri aritu beharko lukete garai berriak eskatzen dituen erantzun moldeak bilatzen eta jorratzen», baina gatazkaren konponbideari «galga jartzen» aritzea leporatu diete.

Ildo horretatik, dei zuzena egin diete Gobernu espainolari eta EAJri, «euskal gazteriaren kontrako jazarpena eten eta has daitezen behingoz garai berriek eskatzen duten moduan erantzuten. Herri honetan gatazkaren konponbide demokratikoaren aldeko aldarria gero eta ozenagoa da. Herri honek ez du onartuko bere oraina eta etorkizuna gartzelarazterik».