Larunbatean San Mamesetik atera eta «ibai zuri-gorria» osatzeko deia egin dute hainbat peñak

Athleticen eta Almeriaren artean larunbatean jokatuko den partidaren bigarren zatiko 20. minutuan San Mamesetik atera eta presoen eskubideen alde egingo den «mobilitsasoa»rekin bat egiteko deia egin dute hainbat peñak.

Athleticeko Piratak, Zazpaik bat, Herri Norte taldea, Pello, Harrapakari, Jarrillera eta Bittor Alkiza peñek bat egin dute Bilbon larunbatean presoen eskubideen alde osatuko den itsaso erraldoiarekin eta taldearen zaletuei ere tanta bilakatzeko deia egin diete.

Hala, larunbatean jokatuko den Athletic eta Almeriaren arteko partidan «giza ibaia» sortzeko asmoa adierazi dute, «giza eskubideak, gatazkaren konponketa eta bakearen aldeko itsasora joango den ibaia».

Deialdi zehatza ere egin diete Athleticeko zaletuei: partidaren bigarren zatiaren 20. eta 40. minutuetan estadioaren inguruetan banatuko diren presoen eskubideen aldeko ikurrak erakutsi ditzatela, eta bigarren zatiaren 20. minutuan, 17.20ean gutxi gora behera, banderola eserlekuan utzi, San Mamesetik atera eta La Casillara joango den «ibai zuri-gorria» osa dezatela.