Minutuko isiluneak eta elkarretaratzeak, ‘Charlie Hebdo’ eta erasoaren biktimak gogoan

Dolu eguna dute gaurkoa Estatu frantsesean. Eguerdian minutu bateko isilunea egin da, ‘Charlie Hebdo’ agerkariaren aurkako erasoan zendutako hamabi lagunak gogoratzeko eta Euskal Herrian ere izan dira sarraskiaren aurkako adierazpen eta elkarretaratzeak.

Eguerdia iristearekin batera, minutu batez erabat gelditu da Estatu frantsesa, ‘Charlie Hebdo’ aldizkariaren aurkako atentatuan zendutako hamabi lagunak omentzeko.

Komunikabide nagusiek bat egin dute ekimen sinboliko honekin, beren kideak gogoratzeko.

Estatuko zenbait erakundek ere egin dute minutu bateko etena, hala nola, Eliseoak, Asanblea Nazionalak edota Jendarmeriaren egoitzak. Tokian tokiko erakundeetan ere antzeko mobilizazioak burutu dira.

Garraio publikoaren sarea ere minutu batez geldirik izan da Parisen, Notre Dameko kanpaiek ere hildakoen omenez jo dutelarik.

Euskal Herrian ere bai

Munduko herrialde askotan izan dira ‘Charlie Hebdo’-ren aurkako erasoan hildako lagunekiko elkartasun keinuak eta Euskal Herrian ere hala izan da.

Biarritzen, Baionan, Angelun eta Donibane Garazin, esate baterako, elkarretaratzeak egin dituzte eguerdian. Lapurdiko hiriburuan «martxa errepublikarra» deitu du Herriko Etxeak larunbaterako, 14.30ean.

Bilbo eta Gasteizko udaletxeen atarietan ere erasoa gaitzesteko kontzentrazioak egin dituzte.