Sakabanaketaren ondorioz hildako 16 senideentzat aitortza aldarrikatu du Etxeratek

Memoriaren Egunean sakabanaketa politikaren ondorioz hil diren euskal presoen 16 senide eta lagunentzat aitortza aldarrikatu du Etxeratek Gasteizko Legebiltzarraren aurrean egin duen elkarretaratzean. «Zergatik memoria batzuentzat eta amnesia besteentzat?», galdetu du.

Etxeratek elkarretaratzea egin du Gasteizko Legebiltzarraren aurrean, Memoriaren Egunaren harira, sakabanaketaren ondorioz hil diren euskal presoen 16 senide eta lagunen aitortza aldarrikatzeko.

Urtzi Errazkin bozeramaileak Parlamentuak antolatu duen ekitaldiak izan duen «hutsunea» salatu du, izan ere ETAren eta polizia indarkeriaren biktimak bakarrik izan dituzte gogoan ekitaldi instituzionalean, baina «beste biktima batzuk alde batera utzi dituzte» eta hori Etxeratek «ezin du onartu».

Parlamentuaren ekitaldiak «ez ditu biktima guztiak ordezkatzen eta indar politikoek badakite. Su horrek bizitza batzuk besteen gainetik daudela adierazten du eta hori ankerra da», salatu du.

Hala, dispertsioaren ondorioz hil diren 16 lagunak ezin direla «ahanzturan utzi eta trafiko istripu baten biktima gisa» geratu aldarrikatu du. «Su horrek iluntasunean utzi nahi ditu betirako dispertsioaren errepideetan galdu ziren 16 bizitza», nabarmendu du, eta zera galdetu: «Zergatik memoria batzuentzat eta amnesia besteentzat?».

Errazkinek esan duenez, txosten bat prestatu du Etxeratek, 16 biktima horiek ohoratu eta biktima gisa hartuak izan daitezen arrazoiak agertzeko. «Zoritxarrez dispertsioak oraindik ere biktima gehiago sor ditzake», ohartarazi du.

Elkarretaratzean EH Bilduko parlamentariek arrosak eta krabelinak eman dizkiete senideei, babesa adierazteko.

Arratsaldean berriro elkarretaratzea egingo du Etxeratek Bilbon, Gogora Memoriaren Institutuaren inaugurazioan, 17.30ean.