Datorrena autogobernuan aurrera egiteko urtea izango dela dio Iñigo Urkulluk urte bukaerako mezuan

Susperraldi ekonomikoa, bakegintza eta bizikidetza hartu ditu hizpide Iñigo Urkullu lehendakariak urte bukaerako bere mezuan. Heltzear den 2016a «lankidetzaren, akordioaren eta parte-hartzearen bitartez» autogobernuan aurrera egiteko urtea izango dela nabarmendu du. Ordezkari politikoek erabaki eta gizarteak «legalki berretsi» behar duela gaineratu du.

Gizarteari zuzendutako urte bukaerako mezuan, Iñigo Urkulluk Eusko Jaurlaritzaren lehen lehendakaria, José Antonio Agirre, gogoratu du, izan ere, 80 urte bete berri dituzte haren agintaldiak eta «Euskadiko lehen Estatutuak». Urkulluk nabarmendu duenez, Agirreren ondareak «indarrean jarraitzen du» zenbait alorretan, esaterako «Euskadiren erakundetzea, pertsonak ardatz dituen politika, humanismoaren eta gizarte-justiziaren balioak, eta euskararekin eta kulturarekin konpromisoa».

Datorren urteari begira, 2016an «autogobernua babestea eta ildo horretan aurrera egiten» jarraitzea dagokiola esan du, «lankidetzaren, akordioaren eta parte-hartzearen bitartez, jada eraikitakoak harturik abiapuntu gisa».

Aurrera egite hori ordezkari politikoek eta erakundeetako ordezkariek erabaki behar dutela gaineratu du, eta euskal gizarteak «legalki» berretsi behar duela.