Carrera tiratzaile bilbotarra, berriro ere puntu bakarrarengatik finaletik kanpo
Pablo Carrera tiratzaile bilbotarrak ez du lortu aire pistolako 50 metrokoaren finalean sartzea. 10 metrokoan gertatu zitzaion bezalaxe, puntu bakar bat falta izan zaio.
Carrerak ez du zortea bere alde Rioko Joko Olinpikoetan. Larunbatean aire pistolako 10 metroko modalitatean gertatu zitzaion bezalaxe, 50 metrokoan ere finaletik kanpo gelditu da puntu bakar baten faltan.
30 urte dituen tiratzaile bilbotarrak 555 puntu bildu ditu, zortzigarren sailkatu den Wan Zhiwei txinatarrak baino bat gutxiago. Berdinketa izan balitz, bilbotarrak egingo zukeen aurrera.
Pekin eta Londresko jokoetan gailendu zen Jin Jong-oh hegokorearra izan da sailkatze fasean puntu gehien bildu dituen tiratzailea (567). Haren atzetik sailkatu dira Pang Wei txinatarra (565) eta Han Seung-woo hegokorearra (562).