‘Eguna’ egunkariaren oroigarria jarri dute Alde Zaharrean

Euskara hutsean idatzitako lehen egunkaria sortu zenetik 80 urte betetzen direla ospatzeko asmoz, Udalak oroigarri bat jarri du Posta kalean.

1937ko urtarrilaren 1ean, Alde Zaharreko Posta kaleko 17an, sortu zen ‘Eguna’ egunkaria eta urte bereko ekaineanarte iraun zuen tropa fankistek Bilbo hartu arte.

Euskarazko egunkari haren sorreraren 80. urteurrena gogora ekartzeko asmoz, Bilboko Udalak, Euskaltzaindiarekin, Euskal Pen Klubarekin, Sabino Arana Fundazioarekin eta Deia egunkariarekin batera, plaka bat jarri du Posta kalean.

Juan Mari Aburto Bilboko alkateak eta Bingen Zupiria Kultura eta Hizkuntza Politikako sailburuak agerian utzi dute plaka gaur goizean Posta kalean. Alkatearekin batera, besteak beste, udalkideak; Andres Urrutia, euskaltzainburua; Juan Mari Atutxa, Sabino Arana Fundazioko lehendakaria; eta Laura Mintegi, Euskal Pen Klubeko presidentea egon dira; baita Deia egunkariko, Euskararen Aholku Batzordeko eta Bilboko euskaltegietako zenbait ordezkari ere.

Jardunaldiak

Otsailaren 10ean Euskaltzaindiaren egoitzan jardunaldiak burutuko dituzte euskarazko lehen egunkariaren inguruan. Bilboko alkateak Andres Urrutia euskaltzainburuarekin eta Juan Mari Atutxa Sabino Arana Fundazioko presidentearekin batera hasiera emango diote jardunaldiari goizeko 9.30ean eta, besteak beste, Joseba Agirreazkuenagak, Xabier Altzibarrek, Luis Alberto Aranberri ‘Amatiñok’, Joan Mari Torrealdaik, Idurre Eskizabelek, Iñaki Mendizabalek, Javier Onaindiak eta Odile Kruzetak parte hartuko dute.