Europara begira jarri da Eibar erakustaldia emanda (0-4)

Partida handia egin du Eibarrek Mestallan eta Europako postuetik bi puntura lo egingo dute Mendilibarren mutilek. Enrich (bitan), Adrian eta Dan Garcia kapitaina izan dira goleatzaileak. (Partidaren datuak).

Gora begira dabil Eibar. 20 jardunaldi eta gero zortzigarren postuan dago, 32 punturekin eta Europan sartzeko borrokan aritzeko moduan. Gaurkoan Mestalla hartu dute armaginek, hasiera-hasieratik Valentzia baino askoz gehiago izanda.

Baloia berea egin du lehen minututik talde gipuzkoarrak, baina lehen aukera garbia etxekoena izan da. Zazak buruan izan du gola, baina ez du atearekin asmatu. Hutsik egin ez duena Sergi Enrich izan da. 28. minutuan Escalantek erdiraketa bikaina egi ndu eta plantxan errematea eginda aurretik jarri ditu gipuzkoarrak.

Eroso Eibar zelai gainean eta are erosoago egonen zen atsedenaldiaren aurretik Adrian Gonzalezek 11 metrotatik bigarrena egin eta gero. Gainera, jokaldi horretan, epaileak Carlos Soler jokalari gaztea kaleratu du, Escalante jotzeagatik.

Bigarren zatian kontrola erabatekoa izan da eta garaipena eskura izan arren ez dio eraso egiteari uko egin Eibarrek. Eta halako batean gogoan izateko moduko gola egin du Dani Garcia kapitainak. Boleaz, areaz kanpotik, sekulako jaurtiketa egin du erdilariak. Oraindik ere izan da beste gol bat egiteko denbora. Kontua ireki duen Enrichek egin du laugarrena ere, eta aurtengo ligan dagoeneko zortzi egin ditu aurrelariak.