Auzo elkarteek eta 200 bat eragilek «beste Bilbo bat» aldarrikatuko dute larunbat eguerdian

Bilboko auzo elkarteen federazioak deituta «beste» hiri eredu bat «posible» dela aldarrikatuko dute larunbat eguerdian. 200 bat eragilek babestu dute manifestazioa, sindikatuak, gizarte arlokoak eta alderdi politikoak, EH Bilduk bilbotarrei parte hartzeko deia luzatu die.

Bilboko Auzo Elkarteek larunbaterako deitutako manifestazioan parte hartuko duela iragarri berri du EH Bilduk, beste 200 gizarte eragile eta sindikalek ere bertan izango direla adierazi dute.

Mobilizazio horrekin beste hiri eredu bat aldarrikatuko dute. «Beste Bilbo bat» posible dela uste dute «gizatarriagoa eta sozialagoa».

EH Bilduren ustez, orain auzoen unea heldu da eta auzoak izan behar dira protagonista Bilboren garapenean. Ohar batean azaltzen dutenez, «orain arte hiriak bizi izan dituen aldaketak auzoetan bizi diren askoren esfortzuarekin lortu da. Hala ere, hiriaren garapena ez da inklusiboa izan eta bretxa soziala gero eta ageriagokoa da eta abiadura biko Bilbo bat indartu da».

EH Bilduren iritziz, «aldaketak» beharrezkoak dira, baina ez soilik azpiegituren arloan. «Probreziarekin, prekarizazioarekin edo espazio publikoaren pribatizazioarekin bukatu behar da. Horren aurrean, hiri inklusiboago eta integratzaileago baten alde lan egin behar da, auzokideen erabakitzeko ahalmena indartuz», aldarrikatu dute koaliziotik.

EH Bildutik nabarmentzen dutenez, auzoak eta auzokideak hartzen diren erabakien parte izan behar dira «etorkizunean eragiten diete erabakietan benetako parte-hartze baten alde egin behar da». «Gaur egungo eredua, alegia, goitik behera aldatu behar da», azpimarratzen dute eta larunbateko bilbotarrei parte hartzeko deia luzatzen die.