Mobilizazioekin hasi dute ikasturtea Seaskako ikasle, guraso eta irakasleek
Parisko Hezkuntza Nazionalak Seaskari ukatzen dizkion irakasle postuak aldarrikatzeko mobilizazioekin hasi dute ikasturtea ikasle, guraso eta irakasleek.
Joan zen ostiralean Pauen errektoretzaren aurrean izan ziren Seaskako langileak Hezkuntza Nazional frantsesak eskaintzen dizkien baliabide eskasak salatzeko. Gaur, ikasturte hasierarekin batera, mobilizazioekin jarraitu dute ikastoletako ikasle, guraso eta irakasleek eta hala, ikastetxeetara sartu aurretik, elkarretaratzeak egin dituzte.
Bernat Etxepare lizeoko buraso, irakasle eta ikasleak elkartu dira ikasturte berriaren lehen egunean postuen ukapena deitoratzeko #kasuikastolakexu pic.twitter.com/mBmlPjh3g4
— Iurre Bidegain (@Iurrebidegain) September 3, 2018
Ikasturte berriari bermearekin ekiteko 25 irakasle lanpostu gehiago behar ditu Seaskak, baina Hezkuntza Ministerio frantsesak bost eta erdi besterik ez dizkie eskaintzen. Iragan ostiralean Pauen ikuskaritzako ordezkariekin bildu ziren, baina «baliabide gehigarririk eskaintzeko aukerarik» ez dagoela adierazi zieten.
Ziburuko Piarres Larzabal kolegioko irakasle, guraso eta ikasle protesta burutzen ari dira irakasle postu berriak eskatzeko. @seaskaikastola pic.twitter.com/JUQ4wN46QI
— Maite Ubiria (@Maite_Ubiria) September 3, 2018
Bilera egingo dute bihar
Bihar bilera egingo dute Paueko errektoretzak, Seaska eta Euskararen Erakunde Publikoaren ordezkariek (EEP). Hur Gorostiaga Seaskako zuzendariak, ordea, ez du itxaropen handirik bilera horrekin.