Senatuak Gernikako Estatutuaren aurka onartutako mozioa «oso larritzat» jo du Legebiltzarrak

EAJ, EH Bildu eta Elkarrekin Podemosen bozkekin, Gasteizko Parlamentuak atzo espainiar Senatuako Araba, Bizkaia eta Gipuzkoa eskumenen transferentzia bukatutzat emateko onartu zuen mozioa «oso larritzat» jo du  eta 1978ko Konstituzioan zehaztutako lurralde eredua «agorturik» dagoela «agerian» utzi duela nabarmendu du.

Gasteizko Parlamentuak «oso larritzat» jo du Senatuak atzo Araba, Bizkaia eta Gipuzkoa eskumenen transferentzia bukatutzat emateko onartu zuen mozioa aurrera ateratzea eta «erabateko gaitzespena» adierazi du. «Adierazpen hori jauzi kualitatiboa da birzentralizazio eta inboluzio demokratikoaren bidean», dio sinatutako dokumentuak. Senatuaren mozioari erantzunez EAJko Joseba Egibarrek, EH Bilduko Maddalen Iriartek eta Elkarrekin Podemoseko Lander Martinezek sinatu dute adierazpena.

Zentzu horretan, Gernikako Estatutua «derrigorrez bete beharreko legea» dela berretsi du Parlamentuak eta, ondorioz, osorik bete dadila exijitu du, transferitu gabe dauden eskumen guztiak EAEko instituzioetara eskualdaturik, Gizarte Segurantzaren erregimen ekonomikoaren kudeaketa eta espetxeen antolaketa, erregimena eta funtzionamendua barne.

Senatuaren adierazpenak 1978ko Konstituzioan zehaztutako lurralde eredua «agorturik» dagoela «agerian» utzi duela adierazi dute eta «beharrezkoa» dela «eredu berri bat» diseinatzea, «Estatuaren nazio-aniztasunean eta modu libre eta baketsuan adierazitako herritarren borondate demokratikoan oinarriturik».