Haranbururen askatasun eskaerari buruzko dei auziaren emaitza urriaren 8an jakingo da
Hurrengo udaberrian 30 urte kartzelan beteko duen Xistor Haranbururi baldintzapeko askatasuna ematearen alde azaldu zen iragan uztailaren 5ean Zigorrak Aplikatzeko Auzitegia. Prokuradoreak berehala helegitea aurkeztu zuen epaileak harturiko ebazpenaren kontra eta gaur dei auzia iragan da Parisen. Preso senpertarrak Lannemezango espetxetik hitza hartu du, bideokonferentzia bitartez. Auzitegiak urriaren 8an jakinaraziko du bere erabakia.
Iragan maiatzaren 7an Zigorrak Aplikatzeko Auzitegiak Haranburuk aurkezturiko bigarren prozedura aztertu zuen.
Dagoeneko senpertarrak 2013an aurkeztu zuen lehenengo askatasun eskaera errefusatu zuen frantses justiziak.
Espainiar estatuan Unai Parot atzeman ondoren, Xistor Haranburu, Jakes Esnal eta Ion Kepa Parot Lapurdin atxilotu zituzten.
1990an bizi osorako espetxe zigorra ezarri zien frantses justiziak.
Epai horren arabera Haranburuk 2008az geroztik baldintzapeko askatasuna lortzeko eskubidea zuen. Izan ere, berme guztiak izan arren –azkeneko epaiketan Lannemezango kartzelako zuzendariaren babesa jaso zuen– prokuradoreak aukera hori behin eta berriro blokeatu du.
Prokuradorea, ildo beretik
Maritxu Paulus-Basurko abokatuak NAIZi azaldu dioenez, aurreko saioan bezala, prokuradoreak bere argudioak atxiki ditu dei auzian, Haranburu preso atxikitzeko eskaera berretsiz.
Xistor Haranburu askatzeak «orden publikoa kolokan jarriko zuela» adierazi du prokuradoreak. Hori gutxi balitz, egun 65 urte dituen presoa kartzelatik ateraz gero «berriz borrokara lotzeko arriskua» nabarmendu du.
Preso lapurtarraren abokatuak, berriz, Euskal Herriak bizi duen egoera berrian fiskalak nabarmendu dituen arriskuak ez direla sinesgarriak adierazi du. Bestalde, espainiar Estatuan kondenatua izan balitz 30 urte beteta Haranburu kalean egongo zela oroitarazi du. Aldiz, estatu frantsesean bizi osorako zigorra jaso zuenez ateratzeko datarik ez duela agerian jarri du.
Ondoren, preso senpertarraren askatasuna onartuz epaileak hartu zuen erabakia berrestea eskatu du.
Auzitegiak heldu den urriaren 8an jakitera emanen du bere erabakia.
Sostengu zabala
Gogoratu behar da prokuradoreak auzi honetan harturiko erabakia salatzeko mugimendu zabala azaldu zela, iragan uztailaren 5ean, Ipar Euskal Herrian.
Euskal Elkargoaren egoitzan besteak beste Jean-René Etchegaray lehendakaria, Lucien Betbeder Ipar Euskal Herriko Auzapezen Biltzarreko presidentea, Max Brisson senatari eskuindarra edo Emilie Dutoya (PS) eta Alize Leiziagezahar (Berdeak) Akitania Berriko eskualde kontseilariak elkartu ziren.
Prokuradoreak harturiko jokabidearen berri izan ondoren adierazpen gogorra zabaldu zuten terrorismoaren aurkako saileko jardunaz gain «frantses justiziaren politizazioa» salatuz.