Pirritx, Porrotx eta Marimototsek ‘Bizi dantza’ ikuskizunarekin DVDa kaleratu dute

Azaroan aurreztu zuten pailazoek euren ikuskizun berria dantza tradizionaletan oinarrituta. Urtarrila amaieran Andoainen eskaini zuten emanaldia grabatu egin zuten eta orain DVDa osatu dute irudiekin.

Euskal Dantzen tradizioari begiratu diote Pirritx, Porrotx eta Marimototsek ‘Bizi dantza’ ikuskizunean. Ohorezko kontrapasa, kalejira, martxa, txapeloaz, dantza jauzia, katadera edo aulki dantza, Xan Petrike dantza, esku dantza, fandangoa, banangoa, … dantzak gure kulturan eta gugan duen eraginari erreparatu diote, Vanesa Castaño eta Jon Maya dantzari errenteriarren laguntzaz.

Tradiziotik edan eta Leire Bilbaoren hitzekin, Xabier Zabalaren doinuekin kantari eta dantzan aritu dira oholtzan pailazoak eta Errenteriako Udal Musika eta Dantza Eskolako haurrak eta Erein dantza taldeko gazteak. Oraingoan DVDa aurkeztu dute, Andoaingo Bastero antzokian urtarrilean egindako ikuskizuna jaso ostean. Produktu

‘Bizi dantza’ ikuskizuna azaroan estreinatu zuten, eta koronabirusaren izurriteak dantza geldiarazi bitartean, 46 herritan eskaini zituzten saioak, tokian tokiko dantza taldeekin batera. Herriz herri, kolore eta izaera askotako dantza taldeak ezagutu dituzte, haiekin batera dantzatuz eta gozatuz eta irailetik aurrera dantzan jarraitzeko asmoa dute «herriz-irri».

«Lurra sortu zen unetik bertatik, jirabiraka dantzari hasi zen bere buruaren eta eguzkiaren inguruan. Animaliak ere sortu ziren unetik bertatik, dantzari dabiltza lurraren inguruan. Geu ere hitzaren jabe izan aurretik dantzatzen gara, zaldiak, izurdeak eta tximeletak bezala. Pozak eta tristurak azaltzeko dantzatzen gara. Barruak agintzen digunean dantzatzen gara. Gure kultura ospatu eta errituak berritzeko. Garen hori mugimenduan jartzeko. Zangoak luzatuz, gerria mugituz, hegoak astinduz eta ur azpian ere dantzatzen gara gu. Zatoz gurekin dantzara, atera zure barruko animalia plazara!», dio Leire Bilbaok idatzitako testuak.