Azpeitiko taberna eta jatetxeetako langile guztiei PCR probak egingo dizkiete

Azpeitiko Udalak PCR probak egiteko eskatu die gaur taberna eta jatetxe guztietako arduradun eta langileei, eta ez soilik alde zaharrekoei, hilaren 13an inguru horretan antzemandako covid-19aren agerraldi berriari aurre egiteko. Orain arte 94 pertsona kutsatu dira.

Azpeitiko Udalak ohar baten bidez jakitera eman duenez, hasiera batean «fokua» alde zaharrean egon bada ere, zehazki Erdikale kaleko tabernen inguruan, «prebentzio moduan» eta Lakuako Gobernuaren Osasun Sailarekin «adostuta», «herri osoko ostalaritzako langile guztiei» detekzio probak eskaintzea erabaki dute.

Horretarako, Udalak zuzenean eta gutun bidez eskatu die PCR probak egiteko, «lehenbailehen jakiteko» birusen agerraldiaren nolakotasunak, eta «egoerari ahalik eta azkarren buelta ematen hasteko».

Azaldu duenez, langileren batek testetan positibo ematen badu, Udaleko arduradunak lokaleko kudeatzaileekin harremanetan jarri ahal izango dira, eta erakundea lokala desinfektatzeaz arduratuko da, alde zaharreko taberna eta jatetxeekin egin duen bezala.

Udalak ohar baten bidez jakinarazi duenez, atzo, astelehena, inguru horretako «ostalaritza establezimendu guztiak» desinfektatuta geratu ziren, eta gaur «ziurtagiri» bat jasoko dute, «covid-19 gabeko toki seguruak» direla egiaztatzen duena.

Azpeitiko alde zaharreko tabernak ixtea izan zen joan den ostiralean Udaleko eta ostalaritzako arduradunek egindako bileran adostutako neurrietako bat, Udalak zehaztu duenez. Josu Labaka Zerbitzu Orokorretako zinegotziak adierazi duenez, Udalaren helburua «fokua ahalik eta gutxien zabaltzea da».

Ostalaritza-establezimenduak desinfektatzeko lanak Udalak kontratatutako enpresa espezializatu batek egiten ditu.

Lakuako Osasun Sailak emandako azken datuen arabera, igandean egindako PCR proben ostean, Azpeitiko fokuak 94 kutsatze ditu. Azken zenbaketan 5 positibo gehiago bakarrik izan dira.