Erakundeen «sentsibilitate falta» salatu du epaitegian Topoaren lanek kaltetutako bizilagunak

Donostiako Metroaren pasantearen obren kalteak pairatu dituen Amarako bizilagun batek epaitegian deklaratu du ostiral honetan Euskal Trenbide Sarearen (ETS) kontra jarritako salaketaren harira. Satorralaia plataformak elkarretaratzea egin du Justizia Jauregiaren aurrean eta Metroaren pasantea «behin betiko gelditzeko» eskatu du.

Satorralaia plataformako 20 bat ordezkarik elkarretaratzea egin dute ostiral honetan, Donostiako Justizia Jauregiaren aurrean, Metroaren pasantearen obrengatik kalteak jasan zituen bizilagunari babesa emateko. Izan ere, Amara Zaharreko bizilagunak bere lehenengo deklarazioa egin du gaur Euskal Trenbide Sarearen (ETS) aurka jarritako salaketan.

Mikel Alvarezek, Satorralaiako bozeramaileak, salatzailearekin batera, 2019an auzokideek jasan zituzten kalte larrien aurrean erakundeek izan duten «jarduera kalifikaezina» kritikatu du.

Alvarezek salatzaileak kasua azaleratzeko egin zituen ekintza ugarien berri eman du, eta ETSk bere etxebizitzara neurketa egitera joatea lortu zuenean, marruskagailua eta tunel burua bere etxetik ehun bat metrora zeudela esan du.

Kaltetuak azaldu duenez, etxetik atera behar izan zuen lo egin ahal izateko, eta egunez eta gauez errepikatzen ziren zaraten ondorioz, zefalea, antsietatea eta loaren nahasmendua sufritu zuela adierazi du. Bere deklarazioarekin batera, osasun-txosten bat aurkeztu du, eta erakundeen «sentsibilitate falta» salatu du.

Bestalde, Mikel Alvarezen hitzetan, «metroaren lurpeko lanen arazo larriek eta gainkostuek proiektuaren zentzugabekeria berretsi besterik ez dute egiten».

Satorralaiak azaroaren 14an Donostian egingo den manifestazioan parte hartzeko deia egin du, «erantzukizunak argitzea eta makroproiektu honen lanak behin betiko geldiaraztea» eskatzeko. 12.00etan abiatuko da Koldo Mitxelenatik.