LAB sindikatuak ikasturte politiko berria hasi du greba orokorraren beharra aldarrikatuz
Garbiñe Aranburu LABen idazkari nagusiak «Euskal Herritik Euskal Herrirako» greba orokorraren beharra aldarrikatu du, ikasturte politiko berriari hasiera eman dion agerraldi batean. Adierazi duenaren arabera, gehiengo sindikalak bat egiten du grebarekin.
LAB sindikatuak hasiera eman dio asteazken honetan ikasturte politiko berriari, gaurkotasuneko gai nabarmenen irakurketa eginez, eta mahai gainean jarri du «Euskal Herritik Euskal Herrirako» greba orokorraren beharra.
Sindikatuaren Bilboko egoitzan egindako prentsaurrekoan, Garbiñe Aranburuk, LABen idazkari nagusiak, jakinarazi du azken hilabeteetan, sindikatuak proposamen sozioekonomikoa egin duela ikasturte politiko berrirako, eragile sozial eta sindikalekin batera, eta datozen asteetan aurkeztuko du. Programa horren bidez, «garapen-paradigma berri bat» eraiki nahi du sindikatuak. «Lana, pentsioa eta bizitza duina bermatzeko», LABek bi lege-proiektu proposatzen ditu: «Euskal Herriaren lan-kodea eta Gizarte Segurantzaren Legea».
Horrekin guztiarekin, sindikatuak joan den maiatzaren 1ean kaleratu zuen ideia jaso du eta berriro ere greba orokorraren beharra jarri du mahai gainean. Aranbururen arabera, gero eta gehiago dira ideia horrekin bat egiten duten ahotsak, eta gehiengo sindikala grebaren alde agertzen da. Zein unetan egingo den zehaztu ez duen arren, LABeko idazkari nagusiak esan du «greba hori ofentsiban planteatu beharko litzatekeela».
Puntu garrantzitsuen artean, LABek aldarrikatzen du beharrezkoa dela greba hori «patronalari aurre egiteko»; Madrilgo Gobernuari presionatzeko 2010eko eta 2012ko lan erreformak eta pentsio erreformak bertan behera utzi ditzan eta murrizketa gehiago ezarri ez ditzan; eta gobernu autonomikoak interpelatu behar dituela defendatzen du, «itunaren eta hitzarmenaren aukerak erabil ditzaten zerbitzu publikoak indartzeko». Gainera, uste du «burujabetza eta esparru propioa edukiz betetzeko dugun eskubidea aldarrikatzeko balio behar duela, inolako esku-sartzerik gabe». Hala, Aranburuk zehaztu du greba hau «Euskal Herritik Euskal Herrirako» izan behar dela.
Elkarrizketa Sozialaren Mahaia
Agerraldian, Aranburuk langileentzat «aldaketen» beharra aldarrikatu du, eta balioa eman dio bizitza erdian kokatuko duen eredu berri baterako trantsizioari. Alde horretatik, idazkari nagusiak kritikatu du Europako funtsen bidez diru publikoa sartzea erabaki izana, energia-trantsizioari edo digitalizazioari aurre egiteko, paradigma aldatu gabe: «Ez da kapitalismoa auzitan jartzen, berregokitzapen bat planteatzen da, birmoldaketa bat, beti ere kapital transnazionalaren interesak zainduz».
Gizarte Elkarrizketarako Mahaiari dagokionez, Aranburuk azaldu du lan-harremanetan «negoziazio kolektiboa zentralizatu eta ahultzearen aldeko aukera egin dela», eta espainiar Gobernuak «beto-eskubidea ematen diola patronalari». LGSri dagokionez, LABek batez besteko soldataren %60ko erreferentzia eguneratu du, eta egungo proposamena 1.200 eurotik 1.400 eurora pasatu da. Pentsioen kasuan, LABeko idazkaria kezkatuta agertu da, Elkarrizketa Sozialeko espazio hau izan delako «pentsio publikoen murrizketai ateak parez pare ireki dizkiona».
«Lan eta erreforma guztiak atzera botatzen ez diren bitartean, zerbitzu publikoen pribatizazioa eta murrizketa politikak bere horretan jarraitzen duten bitartean, edo lan guztiak aitortu eta balio berdina emateko apustu ausartik ez badago, bizi-baldintzek prekarizatzen jarraituko dute», salatu du Aranburuk.