Josu Apezetxea xareko pilotaria zendu da

2014ko Munduko Txapelketa eta Iruñean 2012an Munduko Kopa jokatu zituen 43 urteko pilotari nafarra asteartean zendu zen bat-bateko gaixotasun baten ondorioz.

Pilota mundua, eta gehienbat trinkete eta xare modalitateak, triste eta atsekabetuta esnatu dira gaur, asteartean Josu Apezetxea Etxeberria pilotari nafarra zendu baitzen, 43 urte zituela, tumore zerebral batengatik.

Goizuetarra zen sortzez, baina azken urteetan Lekunberrin bizi zen emaztea eta bi seme-alabekin. Hainbat txapel eskuratu zituen bere kirol ibilbidean. Espainiako selekzioarekin nazioarteko pilotaria izan zen Mexikoko 2014ko Munduko Txapelketan, eta Iruñean 2012an egindako trinketeko Munduko Kopan parte hartu zuen. Zilarrezko domina eskuratu zuen gainera Nafarroako hiriburuan egindako txapelketa horretan.

Nazioarteko lehiaketez haratago, Josu Apezetxeak behin baino gehiagotan irabazi zituen Nafarroako txapelketak. Azkenekoz 2020an Gorka Continekin batera.

Espainiako Federazioko presidente Julian Garcia Angulok Josu Apezetxearen heriotza deitoratu zuen atzo, heriotzaren biharamunean. Bestalde, Larraun pilota elkarteak bi dolu egunak iragarri ditu.

Izan ere, azpimarratu dutenez, «gogoratu nahi dugu Josu pilota munduari oso lotuta egon dela beti, besteak beste erremonteko eta xareko entrenatzaile izan zen Larraunen. Momentu mingarri hauetan, pilota elkartetik Josuren familiari gure doluminak eta babesa agertu nahi dizkiogu».

Ostegun honetan bertan, arratsaldeko 18.30ean, egingo dute bere omenezko meza Goizuetako elizan.