Amaiurko ustezko bizimodua jaso du Eider Eibarrek GARArekin banatuko den puzzlearekin

Amaiurko gazteluaren inguruan eguzkiari ongietorriaren jairako prestatzen ari dira. Hori da Eider Eibarrek asteburuan GARArekin banatuko den haurrentzako puzzlerako prestatu duen irudian ikusten dena. Jolasean ari dira, puzzlea bera jolasa delako. Baina baita Nafarroako historiara hurbiltzeko modua.

Duela bost mendeko guda izan baino lehen, Amaiurko gazteluan nola bizi ziren erakutsi nahi izan du Eider Eibar ilustratzaileak, GARArekin asteburu honetan haurrentzako puzzlearen irudiaren egileak. Haurrentzako lan bat izanik ez zen komeni gudaren krudeltasuna agerian azaltzea. Edo hori da behintzat etxe honetatik Fermin Munarrizek enkargua egin zionean azaldu ziona. Ehun pieza ditu haurrentzako egindako puzzleak, Xabier Morrasen irudiarenak duen mila piezen aurrean.

Hortaz, jai giroa da irudian agertzen den tono nagusia. Horretarako, Amaiurko gazteluaren inguruan inguru hori suntsitu zuten tropak heldu baino lehen zuten bizimodua islatu nahi izan du. Horretarako, argazkiak eta irudiak ikusi ditu, dokumentazio lana egiteko. XVI. mendean Nafarroan erabiltzen ziren arropak nolakoak ziren jakitea inportantea zen, adibidez. Honekin batera, ikonikoki ezinbestekoak ziren elementuak ere agertzen dira, Nafarroako bandera edo Amaiurko gazteluaren harresiak, adibidez.

Udako solstizioaren inguruan jaia antolatzen ari dira Eider Eibarren irudian agertzen diren haurrak. Giroa argitsua da eta eguzkiaren presentzia nabarmena da. Elkarbizitza eta elkarlana erakusten dute. Pozik daude, festa izango dutelako. Irribarrak nagusi dira azaltzen diren haurretan eta animali ugari ere agertzen dira.

«Jolasean daude. Azken finean puzzle bat jolasa da ere», dio Eibarrek. Bide batez, Nafarroa eta Euskal Herriko historiaren sinboloengana hurbiltzeko tresna egokia izan daiteke ere.