Makroekitaldietako langileen prekarietatea, berriro ere agerian
Metallicak eta Fitok Bilbon emandako kontzertuetan eta BBK Liven lan egin ondoren, oraindik ez dutela kobratu salatu dute dozenaka lagunek sare sozialen bidez. Instituzioek bultzatzen dituzten makroekitaldi hauen lan-baldintzek denbora daramate sindikatu eta beste eragile sozialen jomugan.
Covid-19aren pandemia amaituta eta uda helduta, bueltan dira instituzioek asko maite dituzten makroekitaldiak, eta honekin batera bertan lan egiten duten langileen prekarietatea. Azken egunetan dozenaka lagunek salatu dute sare sozialen bitartez Metallica eta Fitoren kontzertuetan eta BBK Liven lan egin zutela eta oraindik ez dutela beren soldata jaso.
Fito & Fitipaldisen kontzertua ekainaren 11n izan zen San Mamesen, eta Metallica talde kanadiarraren kontzertua uztailaren 3an izan zen, estadio berean. BBK Live uztailaren 7tik 9ra ospatu zen Kobetamendin (Bilbo). Hilabete igaro da, eta Lastour bezalako antolatzaileek «dena ondo» egin dela esan duten arren, egia esan, langile askok Lan Ikuskaritzara jo dute oraindik euro bakar bat ere ikusi ez dutela jakinarazteko.
Ekitaldi horietarako bakarrik kontratatutako pertsonak dira, eta zerbitzari, kutxazain, laguntza-langile, muntatzaile... gisa lan egin dute. Askotan kontratu legalik ez dute, eta lan-baldintzak oso kaxkarrak izaten dira: 8 ordu baino gehiago, soldata baxuak…
‘Deia’ egunkariak adierazi duenez, enpresa kontratatzaileek ziurtatu dute langileek aste honetan kobratuko dutela, baina gaur, osteguna, askok oraindik ez dute diru-sarrerarik jaso. Bat baino gehiago legezko salaketa bat jartzea planteatzen ari da.
EH Bilduk Udal Gobernuari galdegin dio
Horren aurrean, EH Bildu Bilboko udal-taldeak galdera batzuk egin dizkio Xabier Ochandiano Ekonomiaren garapen, Merkataritza eta Enplegu arloko zinegotziari.
«Udalak neurri motaren bat eskatzen al die enpresei hirian antolatzen diren ekitaldietako langileen lan-baldintza duinak bermatzeko?», galdetu dio, besteak beste.
Azken egunetan prentsan agertutako informazioen harira, Bilbon egin diren ekitaldietako langileen lan baldintzen inguruan galdetu diogu Garapen Ekonomikoko Sailari
— EH Bildu Bilbo (@ehbildubilbo) August 11, 2022
⤵️ pic.twitter.com/YAypytpJJ1
Errepikatzen den kontua
Eraginek, Bilboko gazte prekarizatuen asanbladak, 2019an gogor salatu zituen BBK Liven ematen ziren lan-baldintzak.
Orduko 5 eurotik beherako soldatak, baita 3,5 ere kasu batzuetan, 15 orduko lanaldiak atsedenerako eskubiderik gabe... horrelako egoerak salatu ziren urte horretako jaialdian.
Gainera, Eraginek salaketa kanpaina bat hasi zuenean, Last Tour sustatzaileak auzitegietan salaketa bat jartzearekin «mehatxatu» zuen, «izen ona zikintzeagatik».